સાંપ્રત

ઇઝરાયલ અને ઈરાનનો ટપલીદાવ

- વિનોદ પંડ્યા

ગઈ ૧૩મી એપ્રિલના રોજ ઈરાને ઇઝરાયલ પર અગાઉ ક્યારેય ન કર્યો હોય તેવો હુમલો કર્યો. ૩૩૦ જેટલાં ડ્રોન વિમાનો અને મિસાઇલો ઇઝરાયલ પર છોડ્યાં. આ ઘટનાથી દુનિયા હેબતાઈ ગઈ, કારણકે વિશ્વયુદ્ધ ફાટી નીકળવાની શક્યતા તેમાં હતી. ગઈ સાતમી ઑક્ટોબરે ગાઝાપટ્ટીના ફિલિસ્તીની હમાસ અંતિમવાદીઓએ ઇઝરાયલ પર અચાનક હુમલો કર્યો. ૧૨૦૦ જેટલા યહૂદી આબાલવૃદ્ધ નાગરિકોને મારી નાખ્યા. ૨૦૦થી વધુને બંધક બનાવ્યા. ત્યારથી ઇઝરાયલે ગાઝામાં કાર્યરત મુસ્લિમ હમાસ સંગઠનને નેસ્તનાબૂદ કરવાની પ્રતિજ્ઞા લીધી છે. તેમાં લીલા સાથે સૂકું બળે તે રીતે સદોષ અને નિર્દોષ મળીને છ મહિનામાં ઇઝરાયલી સેનાએ ૩૩ હજાર ફિલિસ્તીનીઓને મારી નાખ્યા છે. હજી એ મુહિમ ચાલુ છે. ઇઝરાયલના પવિત્ર તહેવારના દિવસે હમાસે અચાનક હુમલો કર્યો તેનાથી દુનિયા એટલી ખફા થઈ ગઈ કે દુનિયા ઇઝરાયલને હવે યુદ્ધ બંધ કરવા સમજાવી રહી છે, છતાં તેઓ ઇઝરાયલે કરેલા આક્રમણને વાજબી પણ ગણાવી રહ્યા છે. આ રીતે કેટલાક પડોશી આરબ દેશો પણ પ્રથમ વખત ઇઝરાયલની સાથે ઊભા રહેલા છે.

ઇઝરાયલનાં વલણ અને નીતિ પણ અનોખાં છે. દુનિયા સાથ આપે કે ન આપે, અમેરિકા રાજી હોય કે ન હોય, ઇઝરાયલ હમાસ હટાવની લશ્કરી ઝુંબેશ બંધ કરવા તૈયાર નથી. બલ્કે હમાસને મદદ કરવા તત્પર રહેતા પેલેસ્ટાઇન (ફિલિસ્તીન), લેબેનોન અને આતંકી સંગઠન હિઝબોલ્લાહને અને તેના જનક ઈરાનને પણ તક મળે ત્યારે સીધા દૌર કરવાનો ઉમંગ પણ ઇઝરાયલીઓમાં ઘણો ઊંચો છે. તેઓની આ યુદ્ધ ઝુંબેશ વધુ લાંબી ચાલી અને દુનિયામાં તેનો વિરોધ વધતો ગયો, પણ ઇઝરાયલ તેના મકસદમાં અડગ રહ્યું છે.