પંચામૃત

મિલકત માણસથી બને છે

- ભૂપત વડોદેરિઆ

તમારા વિષે અમુક માણસ શું માને છે અગર શું કહે છે તે તમારા માટે એટલું મહત્ત્વનું નથી. સૌથી વધુ મહત્વનું તો એ છે કે તમે તમારા વિષે શું માનો છો? તમારી સામેના આક્ષેપો તમે તદ્દન જુઠા માનતા હો તો તમારે એટલા બેચેન બનવાની જરૂર નથી. તમારી સામેના આક્ષેપોમાં તમને કંઈ પણ તથ્ય લાગતું હોય તો તમારા માટે વધુ સારો રસ્તો તમારી એ ત્રુટિઓને દૂર કરવાની કોશિશ કરવાનો છે. કેટલીક વાર આપણે આપણી કેટલીક ત્રુટિઓ જાણતા હોઈએ અને છતાં તે દૂર કરવાની સ્થિતિમાં ના હોઈએ એવું પણ બને છે, આવા સંજોગોમાં આપણે આપણી ત્રુટિઓ અને આપણી મર્યાદાઓ સમજવાની અને સ્વીકારવાની રહે છે. આપણી એક અગર બીજા પ્રકારની નિંદા કરનારાઓ પ્રત્યે આપણે અસહિષ્ણુ બનીએ છીએ અને ઉશ્કેરાઈ જઈએ છીએ. તેનું કારણ એ જ હોય છે કે આપણી ખામીઓ અને મર્યાદાઓ આપણે સ્વીકારી શકતા નથી. આપણને તેની જાણ હોય છે અને બીજાને તેની જાણ ના થાય તેવા હેતુથી આપણે તેને ઢાંકવા મથીએ છીએ. આ રીતે તેને બીજાની નજરથી છુપાવવા માટે આપણે કોઈ પણ અતિશયોક્તિ ભરેલા આક્ષેપના જવાબમાં એવો જ અતિશયોક્તિભર્યો રદિયો આપવો પડે છે.