અનોખા શહેર પેરિસની લિમ્પિક પણ અનોખી

રેસવૉકર તરીકે પ્રિયંકા ગોસ્વામી અને અક્ષદીપ સિંહ પેરિસ ૨૦૨૪માં પ્રથમ વખત ભાગ લેશે. મહિલાઓની ૫૭ કિલોગ્રામ બોક્સિંગની સ્પર્ધામાં જસ્મીન લેમ્બોરિયા ભારત તરફથી ભાગ લેશે

- વિનોદ પંડ્યા

આવતી૨૬ જુલાઈ, શુક્રવારના રોજ પેરિસ, ફ્રાન્સ ખાતે ઑલિમ્પિક્સ ૨મતોત્સવની ઉદ્ઘાટન સેરેમની યોજાશે. જેમ પેરિસ શહેર અનોખું અને ભવ્ય છે, તેમ એ ઉદ્ઘાટન વિધિ પણ અનોખી અને ભવ્ય હશે. રવિવાર અગિયાર ઑગસ્ટ સુધી ૨૦૨૪નો પેરિસ ઑલિમ્પિક મહોત્સવ ચાલશે. સત્તાવાર રીતે આ તેંત્રીસમો ઑલિમ્પિયાડ હશે. જેને તેને પેરિસ ૨૦૨૪ નામ આપવામાં આવ્યું છે. તેના માટે જે એમ્બ્લમ અથવા પ્રતીક ચિત્ર રખાયું છે, તે ઘણું અર્થસભર છે. તે એક જલતો દીપક પણ દર્શાવે છે, જેને ઑલિમ્પિક્સની મશાલ ગણી શકાય. એ જ ચિત્ર એક ભોળા બાળકનું પણ છે, જે નિખાલસતા અને ખેલદિલીનું પ્રતીક છે.

આ પેરિસ રમતોત્સવ અનોખો હશે. ખાસ કરીને તેની ઉદ્ઘાટન વિધિ. જેમણે પેરિસની વચ્ચેથી પસાર થતી સેન નદી અને તેના બંને કાંઠાનું પેરિસ જોયું છે, તેઓ અભિભૂત થઈ ગયા છે. પ્રસિદ્ધ એફિલ ટાવર આ સેન નદીના કાંઠે આવેલો છે. પેરિસ એક જૂનું છતાં ખૂબ સુંદર શહેર છે. શહેરમાં સ્થાપત્યો અનેક છે. વર્સાઇલનો પ્રસિદ્ધ રાજમહેલ, શાન્ઝે લિઝિનો ચોક અને દરવાજો, નોટ્રે ડેમનું ચર્ચ, લુત્રનું મ્યુઝિયમ વગેરે અનેક સુંદર સ્થાપત્યો સેન નદીના કાંઠે આવેલા છે. પેરિસ શહેરમાં સેન નદી છ કિલોમીટર જેટલી લાંબી છે. નદીમાં સહેલગાહ માટેની સુંદર બોટો ફરતી હોય છે. નદીના બંને કાંઠે સદીઓથી પાકા પથ્થરોના ધક્કાઓનું બાંધકામ અને તેના પર દર્શકોની બેસવાની પથ્થરોની ગૅલેરીઓ છે. નદીના કાંઠે લગભગ પાંચ-સાત માળની એક સરખી શૈલીથી બાંધેલી હારબંધ ઇમારતો છે, જેના ઢોળાવ આકારના લીલા રંગના છજાંઓ પેરિસની અલગ ઓળખાણ છે. બોટના છ કિલોમીટરના પ્રવાસમાં સહેલાણીઓને સ્થાપત્યો અને સ્થળોનો પરિચય કરાવાય છે.

ઓપનિંગ સેરેમની અનોખી, નવીન એટલા માટે હશે કે દરેક ઑલિમ્પિક્સ રમતોત્સવ વખતે જે-તે દેશની ટીમોના ખેલાડીઓ મેદાન પર ચાલીને પરેડ કરતાં હોય છે, પરંતુ પેરિસ ૨૦૨૪માં ભાગ લેનારા દરેક દેશના ખેલાડીઓ બોટ પર સવાર થઈને સેન નદીમાં લગભગ છ કિલોમીટર લાંબી પરેડ યોજશે. ત્યાં બંને કાંઠે ગોઠવેલી વ્યવસ્થામાં બેસીને કોઈ પણ વ્યક્તિ પરેડ નિહાળી શકશે. દરેકને હાજર રહેવાની છૂટ છે. આ ભવ્ય નજારો ટેલિવિઝન પર અબજો લોકો દ્વારા નિહાળવામાં આવશે.