વિઝા વિમર્શ.

તમે આવું હવાલાનું કૌભાંડ કરો છો?

- ડો.સુધીર શાહ

હેમંત ગ્રેજ્યુએટ થયો કે એના કરોડપતિ પિતાએ એને અમેરિકાની એક ખૂબ જ આગળ પડતી યુનિવર્સિટીમાં માસ્ટર્સનો કોર્સ કરવા મોકલ્યો. યુનિવર્સિટીમાં પ્રવેશ મેળવતી વખતે હેમંતે જણાવ્યું કે એની ટ્યુશન ફી તેમ જ અમેરિકામાં રહેવા ખાવાનો બધો જ ખર્ચો એના કરોડપતિ બિઝનેસમેન ફાધર આપશે. ખાતરી કરાવવા માટે એણે એના ફાધરના છેલ્લાં પાંચ વર્ષના ઇન્કમટેક્સ રીટર્ન અને એમના ચાર્ટર્ડ એકાઉન્ટન્ટે તૈયાર કરેલ નેટવર્થ સર્ટિફિકેટ યુનિવર્સિટીને મોકલ્યાં હતાં.

એ સર્ટિફિકેટમાં બધું જ સાચે સાચું દેખાડ્યું હતું, કારણ કે હેમંતના પિતા ખરેખર કરોડપતિ હતા. એમની ફૅક્ટરી હતી, જેમાં ૩૦ માણસો કામ કરતા હતા. બે મોટરવાન અને ત્રણ ગાડીઓ હતી. એક તો મર્સિડિઝ હતી. રહેવાનો બંગલો હતો અને મ્યુચ્યુઅલ ફંડ તેમ જ શેરોમાં પણ પુષ્કળ રોકાણ હતું.

હેમંતના પિતાની નાણાકીય ક્ષમતા જોતાં જ યુનિવર્સિટીએ હેમંતને પોતાની ત્યાં પ્રવેશ આપી દીધો હતો. સ્ટુડન્ટ વિઝા મેળવવા માટે પણ હેમંતે કોન્સ્યુલર ઓફિસરને એના પિતાની ધનસંપત્તિ દેખાડીને ચકિત કરી દીધા હતા. હેમંત સ્ટુડન્ટ વિઝા લઈને અમેરિકા પહોંચી ગયો.