સમસ્યાનું અસ્તિત્વ તો સ્વીકારો!

ઢળતી ઉંમરે હજી કોઈ રાજકીય મહત્વાકાંક્ષાની લાલચે ગુલામ નબી આઝાદ જેવા વરિષ્ઠ આગેવાને કોંગ્રેસ છોડી હોય તો પણ ખાસ તો રાહુલ ગાંધી સામે એમણે જે બળાપો કાઢ્યો છે એમાં રતીભાર પણ અતિશયોક્તિ નથી. કોંગ્રેસી નેતાઓની તકલીફ એ છે કે ઉઘાડી આંખે પણ એમને હકીકત દેખાતી નથી.

- હીરેન મહેતા

રાહુલ ગાંધી સાથે ગુલામ નબી આઝાદઃ એકને જે બોલવું હતું એ બોલી લીધું, એકને કંઈ સાંભળવું કે જોવું જ નથી.

કોઈ પણ સમસ્યાનો નિવેડો એ સમસ્યા ટાળવાથી નથી આવતો, એને સમયસર ઉકેલવાના પ્રયાસથી આવે છે. રાષ્ટ્રીય સ્તરે નરેન્દ્ર મોદીના ઉદયથી ગણો કે ૨૦૧૪ની લોકસભા ચૂંટણીમાં થયેલા રકાસને શરૂઆત ગણો, કોંગ્રેસનું એ પછી સતત ધોવાણ થઈ રહ્યું છે. ૨૦૧૯ની લોકસભા ચૂંટણીમાં તો કોંગ્રેસની પ્રતિષ્ઠા સાવ તળિયે જઈ બેઠી. ૧૯૭૭ પછી પહેલી વાર ગાંધીપરિવારના કોઈ સદસ્યએ ચૂંટણીમાં પરાજયનું મોઢું જોવું પડ્યું, એ પણ પરિવારના ગઢ ગણાતા ઉત્તર પ્રદેશના અમેઠી મતવિસ્તારમાંથી.