યુવા પેઢીને ધર્મ તરફ વાળવી એ પ્રથમ કર્તવ્ય - શંકરાચાર્ય સદાનંદ સરસ્વતી

ભારતની ચારે દિશામાં આદિ શંકરાચાર્યજીએ સ્થાપેલી ચાર પીઠમાં પશ્ચિમ છેડે અરબી સમુદ્રના કિનારેસ્થિત દ્વારકાની પ્રસિદ્ધ શારદા પીઠના પીઠાધીશ્વર તરીકે ચાર દાયકા બાદ નવા શંકરાચાર્ય તરીકે સ્વામી સદાનંદ સરસ્વતીજી આરૂઢ થયા છે. આજે ધર્મસત્તા-રાજસત્તાના મુદ્દે સમયાંતરે ચર્ચા-વિવાદ છેડાય છે અને ધર્મપાલન તથા સમાજજીવનમાં પણ મોટો બદલાવ આવ્યો છે ત્યારે ‘ચિત્રલેખા’ સમક્ષ શંકરાચાર્યજીએ અનેક વિષયો પર પોતાના વિચારો વ્યક્ત કર્યા.

- દેવેન્દ્ર જાની (રાજકોટ)

સ્વામી સ્વરૂપાનંદ સરસ્વતીજી સળંગ ચાર દાયકા સુધી દ્વારકા શારદા પીઠના શંકરાચાર્યપદે બિરાજ્યા બાદ ૧૧ સપ્ટેમ્બર, ૨૦૨૨ના રોજ બ્રહ્મલીન થયા. મધ્ય પ્રદેશમાં પરમહંસી ગંગા આશ્રમમાં એમને સમાધિ આપવામાં આવે એ પૂર્વે જ શારદ પીઠના ઉત્તરાધિકારી તરીકે દંડીસ્વામી સદાનંદ સરસ્વતીજીની નિયુક્તિ કરવામાં આવી. ૬૪ વર્ષના સદાનંદજી દ્વારકા પીઠનાં ધર્મકલ્યાણનાં કાર્યમાં ગુરુજી સાથે પચ્ચીસ વર્ષથી જોડાયેલા રહ્યા અને એ પછી દંડીસ્વામી તરીકે પણ લાંબો સમય એમણે કર્તવ્યપાલન કર્યું હતું.

દ્વારકા જગતમંદિરને અડીને જ શારદા પીઠ આવેલી છે. દેશની ચાર પીઠમાં દ્વારકા પીઠનું એક વિશેષ મહત્ત્વ છે. સ્વામી સ્વરૂપાનંદજી એકસાથે બે પીઠ દ્વારકા અને ઉત્તરમાં આવેલી જ્યોતિર્મઠના શંકરાચાર્યપદે બિરાજમાન હતા. હવે બન્ને પીઠના અલગ અલગ શંકરાચાર્ય ઘોષિત કરવામાં આવ્યા છે.