આને કહેવાય બેસ્ટ કાઉ હગ..

અમેરિકાના વિસ્કોન્સિન સ્ટેટમાં હમણાં એક ઐતિહાસિક ઘટના બની. જૈનોએ ‘જીવદયા’ શબ્દ વાપર્યા વગર કેવળ શાંતિપૂર્ણ રીતે કાયદેસર રજૂઆત કરીને આશરે ચાર અબજ રૂપિયાનો મીટ પ્લાન્ટ શરૂ થતો અટકાવ્યો

- કેતન મિસ્ત્રી (મુંબઈ)

અમેરિકાના વિસ્કોન્સિન રાજ્યમાં વસતા જૈનાના ડિરેક્ટર કમલ શાહ પાસે કાઉ હગ ડેના દિવસે આપવા જેવા સરસ ન્યૂઝ હતા. અમેરિકાભરનાં વિવિધ જૈનમંડળ જેના નેજા હેઠળ આવે છે એ સંસ્થા એટલે ફેડરેશન ઑફ જૈન ઍસોસિયેશન્સ ઈન નૉર્થ અમેરિકા (જૈના). વાચકો જાણે છે કે થોડા સમય પહેલાં ભારતીય પશુ કલ્યાણ બોર્ડે અપીલ કરી હતી કે ૧૪ ફેબ્રુઆરી, વૅલેન્ટાઈન્સ ડેને કાઉ હગ ડે તરીકે ઊજવો, ગાયમાતાને વહાલ કરો. ખેર, એ મુદ્દે બબાલ મચ્યા પછી આ અપીલ પાછી ખેંચી લેવામાં આવી.

ભારતથી ફરી અમેરિકા જઈએ તો અહીંના વિસ્કોન્સિન રાજ્યમાં અબજો રૂપિયાની મીટ ઈન્ડસ્ટ્રી ધમધમે છે. બે વર્ષ પહેલાં અહીંના જૈનોને ખબર પડી કે અહીંના ફ્રેન્કલિનમાં સ્ટ્રોસ બ્રાન્ડ્સનું એક જંગી કતલખાનું (સ્લોટર હાઉસ) આવી રહ્યું છે. જગ્યા ખરીદાઈ ગઈ છે, પ્લાન બની ગયા છે, સિટીમાં (જેમ આપણી મહાપાલિકા) પ્લાન પાસ થઈ ગયા છે, મશીનરી ઑર્ડર થઈ ગઈ છે. આ બધું જાણીને જૈનાની જીવદયા કમિટીને અરજ કરવામાં આવી કે આપણે કોઈ રીતે આ જંગી કતલખાનું શરૂ થતું અટકાવીએ, પણ કેવી રીતે?

અમેરિકાની સંસ્થા જૈનાની જીવદયા કમિટીના ચૅરમૅન કેતન શેઠ તથા સભ્ય દિલીપ શાહ ચિત્રલેખાને જણાવે છે: ‘અમે વિચાર કર્યો કે થોડો ખર્ચો થાય તોય વિરોધ તો કરવો છે, પરંતુ મોભા સાથે, આપણને શોભે એ રીતે. વળી, આપણે રહ્યા વાણિયા. ધારો કે એક તીર મારીએ, નિશાન પર લાગી જાય ને સ્લોટર હાઉસ નાખવાનું મહિનો ખેંચાઈ જાય તો ૩૦ દિવસમાં સાઠેક હજાર ગાય-ભેંસની કતલ બચાવી શકીએ. જો કે એક મહિનો નહીં, બલકે અમે એમને કોર્ટમાં ઘસડ્યા, બે વર્ષ કેસ ચાલ્યો, લગભગ પંદર લાખ પ્રાણીની કતલ અટકાવી.'