જમ ફરી ઘર ન ભાળી જાય!

પંજાબમાં પાકિસ્તાની સીમાને અડીને આવેલા પોલીસસ્ટેશન પર મોટું ટોળું હુમલો કરે અને એક માથાભારે આરોપીને છોડી મૂકવાની ફરજ પાડે એ કિસ્સો સરકારી યંત્રણાને સાવચેત કરવા માટે પૂરતો છે. આ સરહદી રાજ્યમાં હજી સ્વતંત્ર ખાલિસ્તાનનાં સપનાં જોતા લોકો છે એ જ સૂચવે છે કે ૧૯૮૦-૯૦ના દાયકાના આતંકવાદથી આઘા રહેવું હોય તો..

- હીરેન મહેતા

વિભાજનવાદી અમ્રીતપાલ સિંહના આહ્વાન પછી ઝનૂની ટોળાએ પોલીસસ્ટેશન પર હુમલો કરી એના એક સમર્થકને છોડાવ્યો.

હજી તો એક છમકલું થયું છે, પણ એટલે એને અવગણવાની ભૂલ કરવા જેવી નથી. આગ આખરે તો એક નાનકડા તિખારામાંથી જ લાગે છે.

પંજાબમાં થોડા દિવસ અગાઉ અપહરણ અને મારપીટના એક કિસ્સામાં વેગળા ખાલિસ્તાનની તરફેણ કરી રહેલા વારિસ પંજાબ દે જૂથના નેતા અમ્રીતપાલ સિંહના કેટલાક સમર્થકોની ધરપકડ કરવામાં આવી હતી. અમ્રીતપાલે એના ટેકેદારોને છોડી મૂકવા પોલીસને મહેતલ આપી. શરૂઆતમાં પોલીસે દાદ ન આપી તો બે-ત્રણ હજાર માણસોના ટોળાએ પોલીસસ્ટેશનને ઘેરાવ કર્યો અને જબરી ભાંગફોડ આદરી. જોવાની વાત એ છે કે પોલીસસ્ટેશન પરિસરમાં ઉધામો મચાવનારા માણસો શીખ સંપ્રદાયના ધર્મગ્રંથની પ્રત પાલખી સાથે લઈ ગયેલા, જેથી પોલીસ વળતો પ્રહાર કરે તો ઢાલ તરીકે એનો ઉપયોગ થઈ શકે!

શાંતિ જળવાઈ રહે એવું કારણ આગળ ધરી પોલીસે અમ્રીતપાલના એક ભારાડી સમર્થક લવપ્રીત સિંહ ઉર્ફે તુફાનને છોડી મૂક્યો એમાં તો મર્કટોને દારૂ પીવા મળી ગયો. બાકી હતું તે પોલીસની સૂચનાને અવગણી વિજય સરઘસ કાઢતો હોય એમ અમ્રીતપાલ ધરાર મોટા ટોળા સાથે અમૃતસરના સુવર્ણમંદિર સુધી ગયો. એ પણ ચાકાં-તલવાર અને બંદૂકો સાથે. એ પછી તો અમ્રીતપાલે પોતે પોતાની જાતને ભારતીય ન માનતો હોવાનું વાંધાજનક નિવેદન પણ કર્યું.

આમ તો આપણાં પોલીસદળ આજકાલ વધારે પડતાં સક્રિય થઈ ગયાં છે. નાની નાની વાતે લોકો પર સીધા રાષ્ટ્રદ્રોહના કેસ ઠોકી બેસાડવામાં આવે છે. જો કે પંજાબ પોલીસે અમ્રીતપાલ કે એના ટેકેદારો સામે કોઈ ગંભીર અપરાધ નોંધ્યો નથી. એમના હુમલામાં અનેક પોલીસ અધિકારી ઘાયલ થયા હોવા છતાં! બાકી હોય એમ, પંજાબના પોલીસ વડા અને ખુદ મુખ્ય મંત્રી ભગવંત માને આખા મામલા પર ટાઢું પાણી રેડવાનું કામ કર્યું છે.