આવો જંગ લડવાની ગરમી છે આપણામાં?

બદલાતું ઋતુચક્ર આપણા બધાના જીવનને કોઈ ને કોઈ પ્રકારે અસર કરી રહ્યું છે અને હજી તો એની શરૂઆત છે. એ સામે આપણે યુદ્ધ જેવી સજ્જતા કેળવવાની છે. છીએ આપણે એ માટે તૈયાર?

- હીરેન મહેતા

અમુક વાસ્તવિકતા સ્વીકારીને જીવવાનું રાખીએ તો સ્થિતિનો સામનો કરવાનું સરળ પડે. વાતાવરણની વિષમતાનું વધી રહેલું પ્રમાણ એ આવી એક વરવી હકીકત છે.

માનવજાતની ઉત્ક્રાંતિ સમયથી નિતનવા બદલાવ થઈ રહ્યા છે. માણસે પોતાની સુખ-સુવિધા વધારવા કંઈકેટલીય શોધ કરી. ભૌતિક જરૂરતનાં કેટલાંય સાધનો આપણે ઉમેર્યાં. પગપાળા જમીન પરનું અંતર ફેડતો માણસ આજે તોતિંગ રોકેટના સહારે અનંત આકાશમાં પહોંચ્યો છે અને ત્યાંની હવાવિહીન સ્થિતિમાં સ્પેસ વૉક કરતો થયો છે. દુનિયાની સડકો પર દોડતાં વાહનો કે સમુદ્રની લહેરો પર વિહરતાં જહાજોની સંખ્યાનો તો કોઈ પાર જ નથી. આપણાં ઘરોમાં આજે કેટલીય નવી નવી ચીજ આવી રહી છે.

આ તમામ આવિષ્કાર કોઈ ને કોઈ કિંમતે આવે છે. પ્રગતિ કે વિકાસ મફતમાં થતાં નથી, એના પણ દામ લાગે છે. અત્યારે વિશ્વસમસ્તની વાત કરીએ તો પાછલાં કંઈકેટલાંય વર્ષોથી અવિરત ચાલી રહેલા ઔદ્યોગિક વિકાસની કિંમત આપણે ચૂકવી રહ્યા છીએ. દુનિયાના ગોળા પરના ઘણાખરા વિસ્તારો વિચિત્ર વાતાવરણના સાક્ષી બની રહ્યા છે. ઘરઆંગણાની વાત કરીએ તો એપ્રિલની ગરમીમાં દેશમાં અનેક ઠેકાણે (જ્યાં ન પડતો હોય ત્યાં) બરફ પડ્યો અને માવઠું પણ થયું. અનાયાસ કોઈક વાર આવું થાય તો સમજી શકાય, પણ આવું તો હવે રાબેતા મુજબ વારંવારનું થઈ પડ્યું છે. આમ ને આમ તો આખું ઋતુચક્ર જ બદલાઈ ગયું છે.