અસાંજા કચ્છમાં નવ દિવસ ગુંજતો રહ્યો.. નર-નારાયણ દ્વિશતાબ્દી મહોત્સવ!

જગતગુરુ રામાનંદસ્વામીએ સ્વામિનારાયણ સંપ્રદાયની સ્થાપના કર્યા બાદ ભગવાન સ્વામિનારાયણે સ્વયં પાંચ મંદિર બાંધ્યાં એમાંનું એક એટલે ભૂજનું નર-નારાયણ દેવનું મંદિર. તાજેતરમાં આ પ્રાણપ્રતિષ્ઠાને ૨૦૦ વર્ષ થયાં એ અવસરે ભૂજ ખાતે ઊજવાઈ ગયેલો ઉત્સવ ઐતિહાસિક બની રહ્યો.

- સુનીલ માંકડ (ભૂજ)

૨੦૨૩નું વર્ષ એક રીતે કચ્છ જિલ્લા માટે શુકનવંતું સાબિત થવાનું. વર્ષની શરૂઆતથી જ દુનિયા અને લોકો સાથે જોડાઈ શકાય એવા કાર્યક્રમ આયોજિત થયા છે. એપ્રિલના આરંભે જી-૨૦ જેવા આયોજનનો તબક્કો પૂર્ણ થયો તો જગતગુરુ રામાનંદસ્વામીએ સ્વામિનારાયણ સંપ્રદાયની સ્થાપના કરી તે પછી પ્રથમ વખત ભૂજ ખાતે હમણાં ઊજવાઈ ગયેલો નર-નારાયણ દેવ દ્વિશતાબ્દી ઉત્સવ પણ ઐતિહાસિક બની રહ્યો.

ભગવાન સ્વામિનારાયણે સ્વયં જે મંદિર બાંધ્યાં એમાંનું એક એટલે કચ્છના પ્રસાદીના સ્થળ, ભૂજનું નર-નારાયણ દેવનું મંદિર. શાસ્ત્રો અનુસાર નર એટલે અર્જુન અને નારાયણ એટલે શ્રીકૃષ્ણ. ભૂજ મંદિરને ૨૦૦ વર્ષ થયાં એ અવસરે ભૂજ મંદિરના મહંત સ્વામી ધર્મનંદનદાસજી, ઉપ-મહંત સ્વામી ભગવતજીવનદાસજી, પાર્ષદ જાદવજી ભગત, કોઠારી દેવપ્રકાશદાસજી આદિ વડીલ સંતોના સાંનિધ્યમાં નર-નારાયણદેવનો દ્વિશતાબ્દી મહોત્સવ ધામધૂમથી ઊજવાઈ ગયો.

પોથીયાત્રાથી માંડી સત્સંગી જીવન પારાયણ યજ્ઞ અને યુવા સંમેલન સુધીના તમામ કાર્યક્રમમાં ભક્તિરસ સાથે શિસ્ત અને અનુશાસનનાં પણ દર્શન થયાં.