સુદાન: બે લશ્કરી અધિકારીની લડાઈમાં હોળીનું નાળિયેર બનેલો દેશ

રશિયાએ છેડેલા યુદ્ધને કારણે ગયા વર્ષે યુક્રેન ચર્ચામાં આવ્યું હતું તો અત્યારે વારો ઈજિપ્તના પડોશી દેશ સુદાનનો છે, જ્યાં લશ્કરના બે હિસ્સા પોતપોતાની સર્વોપરિતા સ્થાપવા જંગે ચડ્યા છે અને એમની હુંસાતુંસીમાં આખો દેશ હિંસાના ખપ્પરમાં હોમાઈ ગયો છે.

- નિતુલ ગજ્જર । ઉમંગ વોરા

મૂળ તો આ દેશ જ કંગાળ. દુનિયાના સૌથી ગરીબડા દેશોની યાદીમાં એનું નામ આવે એશિયા-આફ્રિકાનાં અનેક રાષ્ટ્રોની જેમ અંગ્રેજોએ આ દેશનેય લૂંટ્યો હતો. પછી ઈજિપ્તે પણ એમાં મોટું માર્યું. એ બેની ચુંગાલમાંથી છૂટ્યા પછી આઝાદ સુદાનને જે શાસક મળ્યા એણે પણ એ જ કામ કર્યું.

બાકી હતું તે, હમણાં દેશને લૂંટવામાં ભાગીદાર બનેલા બે લશ્કરી અધિકારીઓ અંદરોઅંદર બાધી રહ્યા છે અને એમાં આખા દેશનો ખો નીકળી રહ્યો છે. ઉત્તર-પૂર્વ આફ્રિકાના દેશ સુદાનમાં અત્યારે જે આંતરવિગ્રહ ચાલી રહ્યો છે એનું અતિ સંક્ષિપ્ત વર્ણન આપવું હોય તો આમ કહી શકાય.

દેશનું રક્ષણ કરવાને બદલે સૈન્યના બે હિસ્સા સામસામે લડે એમાં પ્રજાનો તો મરો જ થવાનો ને.. સુદાનની સડકોની આ છે હાલત.

છેલ્લા બાર-તેર દિવસથી અચાનક આ દેશ છાપે ચડ્યો છે. ગયા વર્ષે રશિયાએ એના પડોશી યુક્રેન પર આક્રમણ કર્યું ત્યારે આપણે ત્યાં ઘણા લોકોને એ દેશના અસ્તિત્વની જાણ થઈ હતી. સુદાનનું પણ એવું જ થયું છે. પિરામિડનું નામ પડે એટલે બધાને ઈજિપ્ત યાદ આવે. હકીકત એ છે કે ઈજિપ્ત કરતાં વધુ પિરામિડ સુદાનમાં છે. દુનિયાની સૌથી લાંબી નદી તરીકે આપણે નાઈલનું નામ લઈએ ત્યારે આપણી આંખ સામે ઈજિપ્ત જ આવે. હકીકત એ છે આ નાઈલ નદી પણ સુદાનમાંથી થઈને જ ઈજિપ્તમાં પ્રવેશે છે. એમાંય દાનમાં તો બ્લ્યુ નાઈલ અને વ્હાઈટ નાઈલ એમ બે નદી વહે છે. આ બે નાઈલનો સંગમ સુદાનમાં થાય છે અને ત્યાંથી એક થઈને એ ઈજિપ્ત તરફ આગળ વધે છે. સમગ્ર આફ્રિકા ખંડનો સર્વ પ્રથમ નૅશનલ પાર્ક સુદાનમાં જ છે.

સુદાનનો ઈતિહાસ આવી ઘણી રસપ્રદ માહિતીથી ભર્યો છે. જો કે આપણે ત્યાં બહુ ઓછા લોકોને સુદાન વિશે ઝાઝી જાણકારી હશે.

આપસી લડતમાં સૈનિકોએ ઍરપોર્ટ પરનાં વિમાનોનેય નુકસાન પહોંચાડ્યું એમાં દેશ છોડી જવા માતા લોકો સલવાઈ ગયા.