તેરે ચેહરે સે નજર નહી હટતી..

એક સમયે સાહિર લુધિયાણવીની આ પંક્તિ માત્ર સ્ત્રીને ઉદ્દેશીને કહેવાતી, પરંતુ સૌંદર્ય પામવાનો અધિકાર હવે યુવતીનો જ રહ્યો નથી. આજકાલ યુવાનો પણ લેટેસ્ટ હેરસ્ટાઈલ, ટ્રિમ્ડ દાઢી-મૂછ, મજબૂત જૉલાઈન, સિક્સ પૅક ઍબ્સ કે પછી સપાટ પેટના તલબગાર બન્યા છે, જેને લીધે બ્યુટી માર્કેટમાં અગાઉ ક્યારેય નહોતી એવી તેજી જોવા મળી રહી છે.

- મહેશ શાહ (અમદાવાદ) । કેતન મિસ્ત્રી (મુંબઈ) । અરવિંદ ગોંડલિયા (સુરત)

અમદાવાદના પાંચ-છ મિત્રો રવિવારે સવારે રિસોર્ટમાં વન ડે પિકનિક માટે પહોંચ્યા. ત્યાં મૂડ બની જતાં સ્વિમિંગ પૂલમાં ખાબક્યા. જો કે ફ્રેન્ડની ગૅન્ગના વૈભવે કહ્યું: ‘મને પાણીની ઘાત છે એટલે હું સ્વિમિંગ નહીં કરું.’

‘અરે, કંઈ નહીં થાય. અમે તારી સાથે છીએ..’ એમ કહીને મિત્રો પરાણે વૈભવને ચેન્જિંગ રૂમમાં લઈ ગયા. સૌએ જબરદસ્તી વૈભવનું ખૂલતું શર્ટ ઉતાર્યું એટલે એણે બન્ને હાથ છાતી પર ઢાંકી દીધા.

આ જોઈ ધવલે સીટી મારીઃ ‘ઓહો.. મૅન બૂબ્સ?’ 

મૅન બૂબ્સ એટલે સ્ત્રીનાં સ્તન જેવો દેખાતો પુરુષની છાતીમાં સ્તનગ્રંથિ પરનો ઉભાર. ધવલની જેમ બીજા દોસ્તે પણ વૈભવની છાતીના ઉભાર અંગે મજાક કરી એટલે હતાશાના ભાવ સાથે વૈભવ ફટાફટ શર્ટ પહેરીને બહાર નીકળી ગયો.

અમેરિકન મોડેલ-સોશિયલાઈટ કિમ કાર્ડાશિઆને વૅમ્પાયર ફેસિયલની સેલ્ફી ‘ઈન્સ્ટાગ્રામ’ પર મૂકી અને લોકપ્રિય બનાવી.

વૈભવની જેમ ઘણા યુવકો, પુરુષો છાતીની સ્તનગ્રંથિ પર ઊપસેલા ભાગથી શરમ અનુભવે છે. છાતીનો વધુપડતો ઉભાર છુપાવવા ઘણા યુવકો ટી-શર્ટ પહેરી શકતા નથી, સ્વિમિંગ કરી શકતા નથી. ખાસ કરીને હૉસ્ટેલ કે પેઈંગ ગેસ્ટ તરીકે ગ્રુપમાં રહેતા યુવકો આવા ઉભારથી શરમ અનુભવે.

વૈભવ અને એના જેવા યુવાનો કે પુરુષો માટે જો કે આનો કાયમી ઉપાય ઉપલબ્ધ છે. એ છે સર્જરી, જેમ કે વૈભવે એ ઑપરેશનની મદદથી સ્તનગ્રંથિમાંથી ચરબી દૂર કરાવી. આ સર્જરીને ગાયનેકોમેસ્ટિયા કહે છે.

છેલ્લાં પાંચ વર્ષમાં ગાયનેકોમેસ્ટિયાની પંદરસો જેટલી સર્જરી કરનારા અમદાવાદના જાણીતા પ્લાસ્ટિક અને કૉસ્મેટિક સર્જ્યન ડૉ. અર્થ શાહ ચિત્રલેખાને કહે છેઃ ‘મહદંશે કિશોરવયે જૂજ છોકરામાં તથા અમુક પુરુષોમાં છાતીનો ઉભાર વધેલો જોવા મળે. અનેક કિસ્સામાં ખાસ કરીને યુવાનો ડિપ્રેશનમાં પણ સરી પડતા હોય છે અને આપઘાતના વિચાર સુદ્ધાં કરતા હોય છે.’ ગાયનેકોમેસ્ટિયા સહિત અમુક સર્જરી પ્લાસ્ટિક સર્જ્યન કે કૉસ્મેટિક સર્જ્યન કરે. જો કે એ બધી સર્જરી સુંદરતા મેળવવા થતી નથી. ઘણી સર્જરી વ્યક્તિની અમુક ખોડ, ઈજા, ડાઘ ઢાંકવા કે એની સમસ્યા દૂર કરવા થાય છે.