આંખની રોશની છીનવાઈ છતાં લોકોનાં જીવનમાં એ પાથરે છે ઉજાસ

ગરીબીને કારણે ભણતર છૂટયું, નાની ઉંમરે કમાવાનું ચાલુ કર્યું, ગામ છોડી સુરત જઈ બૅન્કની પરીક્ષા આપી સારા પગારની નોકરી મેળવી, પણ એનાથી બીજાને મદદ નહીં થાય એમ વિચારી એ નોકરી છોડી દીધી. અનેક ધંધા કર્યા, ખભે માલ ઊંચકી ઊંચકીને ફેરી પણ કરી.. આટલાં કષ્ટ વેઠ્યાં, એ ઓછાં હોય એમ કુદરતે દૃષ્ટિ હણી લીધી. બીજો કોઈ માણસ હોય તો હિમ્મત હારી બેસે, પણ દિનેશ પંડ્યા જેમનું નામ. રાજકોટમાં વસતા આ સાહસિક જેમ-તેમ બેઠા થયા અને.. અત્યારે આ ‘મિરેકલ મૅન’ ત્રણ મોટી કંપનીનું સંચાલન કરી રહ્યા છે.

- વિશેષ મુલાકાતઃ દેવેન્દ્ર જાની

પ્રારબ્ધને અહીં ગાંઠે કોણ? હું પડકાર ઝીલનારો માણસ છું,

હું તેજ ઉછીનું લઉં નહીં, હું જાતે બળતું ફાનસ છું..

બસ, આવું કંઈક એમનું જીવન છે. માત્ર ૧૩ વર્ષની વય, પિતાની આવક રોકડા રૂપિયા ૪૦ અને ઘરના સાત લોકોનાં ભરણપોષણની જવાબદારી. આવા કપરા સંજોગોમાં પરિવારને આર્થિક મદદ કરવા સૌરાષ્ટ્રના નાનાએવા ગામમાં મસાલાવાળાં બટેટાં વેચી એણે બે-પાંચ પૈસા કમાવાનું શરૂ કર્યું. પછી તો નાનપણમાં જ ગરીબીને કારણે આ કિશોરને અભ્યાસ છોડવાની નોબત આવી. ગામડેથી પૈસા કમાવા એ સુરત જઈ પહોંચ્યો.

સખત મહેનત કરવા છતાં નસીબે સાથ ન આપ્યો ત્યારે ઈશ્વરને દોષ આપવાને બદલે આ યુવાન સતત ઝઝૂમતો રહ્યો. જો કે એક અણધારી ઘટનામાં એની બન્ને આંખની રોશની છીનવાઈ ગઈ. એના જીવનમાં અંધકાર છવાઈ ગયો, પરંતુ મજબૂત મનોબળનું અજવાળું તો એણે એવું પાથર્યું કે આજે એ હજારો લોકોનાં જીવનમાં પ્રકાશ રેલાવી રહ્યું છે.

આજે જે વ્યક્તિવિશેષની વાત કરવી છે એમનું નામ દિનેશ પંડ્યા. સૌરાષ્ટ્રના એક ગામમાં એમનું બાળપણ વીત્યું. યુવાની જ્યાં વીતી સંઘર્ષમાં જ વીતી. એમાં યુવાવયે આંખે અંધાપો આવ્યો. તેમ છતાં રાજકોટસ્થિત દિનેશભાઈ આજે ત્રણ મોટી કંપનીનું સંચાલન કરી રહ્યા છે. વર્ષે રૂપિયા ૮૦૦ કરોડનો એમનો બિઝનેસ છે અને એ મારફત સેંકડો લોકોને એ રોજગારી આપી રહ્યા છે,

મનગમતું કામ, સખત મહેનત અને સહજ કુદરતી દેન રૂપે મળેલી માર્કેટિંગની જબરી કળ.. આ ત્રણ એમના સંઘર્ષમય જીવનના પાયા છે, જેના આધારે દિનેશ પંડ્યાએ આજે એક સફળ ઉદ્યોગપતિ તરીકે ઓળખ ઊભી કરી છે. અલબત્ત, ત્રણ દાયકાના સંઘર્ષભર્યા જીવનને એ ભૂલ્યા નથી. એમના જીવનને જોઈએ તો કોઈ પણ વ્યક્તિ એવું કહ્યા વગર રહે નહીં કે વિધાતાને પણ ક્યારેય દયા નહીં આવી હોય તે એક માનવીને આટઆટલી શારીરિક અને માનસિક પીડા આપી? જો કે એક પછી એક આવતી રહેલી આફતને હસતા મોઢે એમણે સહન કરી એ પણ એક ચમત્કાર એટલે કે મિરેકલથી કમ નથી. જિંદગીની ગોલ્ડન જ્યુબિલી (૫૦ વર્ષ) ઊજવી રહેલા દિનેશ પંડ્યાના જીવન પર એક પુસ્તક લખાયું છે, જેનું ટાઈટલ જ છેઃ મિરેકલ મૅન!

વર્ષોની કઠોર મહેનત છતાં શરૂઆતમાં નિષ્ફળતા જ મળી, પણ એક વાર ચાડી દોડી એ પછી દિનેશભાઈએ અટકવાનું નામ લીધું નથી. આજે કુશળ સ્ટાફના સથવારે ઑર્મેનિક ખાતર તથા આયુર્વેદિક દવા બનાવતી એમની ત્રણ કંપની ધમધોકાર ચાલે છે.