નબળો રૂપિયો વૈશ્વિક સ્તરે સ્વીકાર્ય નહીં બની શકે...

મોદી સરકાર રૂપિયાની કરન્સીને વિશ્વભરમાં સ્વીકાર્ય બનાવવાનું લક્ષ્ય રાખે છે, રિઝર્વ બૅન્કે આ દિશામાં આગળ વધવા રૂપિયાની ડિજિટલ કરન્સી વિકસાવી છે, પરંતુ આપણું ચલણ બીજા દેશોમાં સ્વીકાર્ય બને ત્યાં સુધી એ મુશ્કેલ લાગે છે.

- જયેશ ચિતલિયા

ઈઝ ઑફ ડુઈંગ બિઝનેસ એટલે કે વેપાર કરવાનું સરળ બનાવવાના સૂત્ર બાદ વડા પ્રધાન નરેન્દ્ર મોદીએ તાજેતરમાં ઈઝ ઑફ ડુઈંગ બૅન્કિંગ (બધા માટે બૅન્કિંગ વ્યવહાર સરળ બનાવવા)નું સૂત્ર પણ જાહેર કર્યું છે. રિઝર્વ બૅન્ક ઑફ ઈન્ડિયાનાં ૯૦ વરસની ઉજવણી પ્રસંગે નરેન્દ્ર મોદીએ આરબીઆઈની ભૂમિકા અને ભારતીય બૅન્કિંગ ક્ષેત્રે થયેલા સુધારા સાથે હવે પછી આવનારા પરિવર્તનના સંકેત આપ્યા. જો કે એ સાથે એમણે જે મહેચ્છા પ્રગટ કરી એ રૂપિયાને વિશ્વભરમાં સ્વીકાર્ય બનાવવાની છે.

ભારતને ૨૦૪૭ સુધીમાં વિકસિત રાષ્ટ્ર બનાવવાના લક્ષ્યની સાથે રૂપિયાનું ચલણ જગતભરમાં માન્ય રાખવામાં આવે એવું બનાવવાની નેમને આ દિશામાં એક અતિ મહત્ત્વનું કદમ ગણી શકાય. અલબત્ત, વર્તમાન સંજોગો અને સંકેતો ધ્યાનમાં લેતાં આ ચઢાણ કપરાં લાગે છે.

મજબૂત અર્થતંત્ર છતાં રૂપિયો નબળો 

આમ તો રૂપિયો મજબૂત થાય અને આંતરરાષ્ટ્રીય સ્તરે સ્વીકાર્ય બને એ ભારતીય અર્થતંત્રના બહુ મોટા લાભમાં જ ગણાય. અત્યારે તો દરેક આયાત વખતે મહદંશે ડૉલરમાં પેમેન્ટ કરવાનું આવતું હોવાથી ભારતને એ મોંઘું પડે છે. નવાઈની વાત એ છે કે અમેરિકી ડૉલર અત્યારે ઘણી આર્થિક સમસ્યા વચ્ચે પણ રૂપિયા સામે ઊંચો રહે છે (એટલે કે રૂપિયો ડૉલર સામે નીચો જ રહે છે). રૂપિયાની નબળાઈને કારણે આયાત તો મોંઘી પડે છે. આપણા નિકાસકારોને ભલે એનો લાભ મળે, પણ અર્થતંત્રને એનો લાભ થતો નથી.