સંબંધોની બેડશીટ આમથી ખેંચો તો તેમથી ખેંચાય...

સુખ રૂટિન થઈ જાય પછી આપણને પ્રશ્ન થાય છેઃ બસ, આટલું જ? હવે બીજું શું? જ્યાં સુધી આપણને એમ થતું રહે કે હું અત્યારે જે કરું છું એના કરતાં વધુ દિલચસ્પ બીજું કંઈક છે ત્યાં સુધી બોરડમથી પીછો છોડાવવો અઘરો છે.બોરડમને દૂર કરવાના તમામ પ્રયાસ છેવટે આપણને વધુ બોરડમ તરફ જ લઈ જાય છે.

- રાજ ગોસ્વામી

અણગમતું લિસ્ટ...

પતિ-પત્ની વચ્ચે લગ્નના એક વર્ષમાં જ મુશ્કેલી શરૂ થઈ. એક દિવસ પત્નીએ કહ્યુંઃ ‘લગ્નને કેવી રીતે મજબૂત કરવાં એ અંગે મેં એક પુસ્તકમાં વાંચ્યું છે. એમાં આપણને એકબીજાની ના ગમતી બાબતોને એક કાગળ પર લખવાની અને પછી સાથે બેસીને એની ચર્ચા કરવાની.'

પતિએ હા પાડી. બન્ને અલગ અલગ રૂમમાં બેઠાં અને એકબીજાને શું નથી ગમતું એનું લિસ્ટ બનાવ્યું. બીજા દિવસે બ્રેકફાસ્ટ પર પત્નીએ ત્રણ પાનાંનો કાગળ કાઢ્યો અને પતિમાં શું શું ખૂટે છે એ વાંચવા લાગી. પતિની આંખમાં પાણી આવી ગયાં. પત્નીએ પૂછ્યું કે શું થયું? તો પતિએ આંખો લૂછીને કહ્યું કે કશું નહીં, તું વાંચવાનું ચાલુ રાખ. પત્નીએ લિસ્ટ પૂરું કર્યું અને પછી પતિને કહ્યુંઃ ‘હવે તારો વારો.’

પતિએ શાંતિથી કહ્યું: ‘મારા લિસ્ટમાં કશું નથી. મને એટલી ખબર છે કે હું પરફેક્ટ નથી, તું પરફેક્ટ નથી અને દુનિયાઆખી પણ પરફેક્ટ નથી, પરંતુ આપણે બન્ને સાથે છીએ એ પરફેક્ટ છે. મારે તારામાં કોઈ ચેન્જ નથી જોઈતો. તું જેવી છો એવી બરાબર જ છો. તું અહીં આ ક્ષણે, મારી સાથે મારી ત્રુટિઓ ચર્ચવા બેઠી છો એ મારા માટે એક પરફેક્ટ ક્ષણ છે.’ હવે આંખોમાંથી પાણી વહાવવાનો વારો પત્નીનો હતો.

***

તાજેતરમાં જાણીતા સંગીતકાર એ.આર. રેહમાન અને એમની પત્ની સાયરા બાનુ ચર્ચામાં હતાં. બન્ને ૨૯ વર્ષ જૂનાં લગ્નમાંથી અલગ થઈ ગયાં છે. ટ્વિટર પર પોતાની ઘોષણામાં ઓસ્કાર વિજેતા રેહમાને લખ્યું હતુંઃ ‘અમને આશા હતી કે અમે ત્રીસ વર્ષ પૂર્ણ કરીશું, પરંતુ એવું લાગે છે કે બધી ચીજોનો એક અદશ્ય અંત આવે છે. ભગ્ન હૃદયના ભારથી ભગવાનનું સિંહાસન પણ હચમચી શકે છે. તેમ છતાં એ કાટમાળમાં આપણે અર્થ શોધીએ છીએ, ભલે ટુકડાઓને ફરીથી એમની જગ્યા ન મળે. મિત્રો, આ નાજુક તબક્કામાંથી પસાર થવાના સમયમાં અમારી પ્રાઈવસીનો આદર કરવા બદલ આભાર.'

દેખીતી રીતે જ મિડિયા અને સોશિયલ મિડિયામાં આ સમાચારને મામલે બહુ ઉત્સાહ સૂચક હતો અને લોકો એમાં જ્યુસ શોધતા હતા, પરંતુ સાયરા વતી એમનાં વકીલ વંદના શાહે એક નિવેદન જારી કરીને કહ્યું છે કે પતિ-પત્નીના તલાક પાછળ બેવફાઈ (લગ્નબાહ્ય સંબંધ) નહીં, પણ બોરડમ કારણભૂત છે.