આ ગુજ઼રાતી અભિનેત્રી તો છે ખરી નીલમ

ફિલ્મકલાકારોની અંગત જિંદગીમાં ડોકિયું કરીએ તો સમજાય કે એમનાં સંઘર્ષ, સપનાં અને આવશ્યકતા આપણા જેવા કૉમન મૅનથી કંઈ બહુ જુદાં હોતાં નથી. અમદાવાદમાં એક વિધવાની ચારમાંથી સૌથી નાની દીકરી જીદ કરીને ઑડિશન આપવા માટે દૂરના સ્થળે ચાલીને ગઈ. કામ મળે તો પરિવારને આર્થિક ટેકો રહે એ ગણતરી. કામ મળ્યું પણ ખરું અને એ દીકરીએ અભિનયની દુનિયામાં નવાં કીર્તિમાન પણ રચ્યાં.

- ઉર્વશી શ્રીમાળી

ગુ જરાતી ફિલ્મોનો નવો દોર શરૂ થયો એ પછી અનેક નવાં નામ અને નવા કલાકાર ગુજરાતી સિનેસૃષ્ટિને મળ્યાં. કહો કે એક નવી ઓળખ આપણી ફિલ્મોને મળી. આ સફરમાં સૌથી વધુ ગૌરવવંતી વાત એ કે ગુજરાતી ફિલ્મો-કલાકારોને નૅશનલ એવૉર્ડ મળવા માંડ્યા. ફિલ્મ હેલ્લારોને રાષ્ટ્રીય સુવર્ણચંદ્રક મળ્યો અને સાથે એની અભિનેત્રીઓને ખાસ રજત પદક મળ્યો. બધી અભિનેત્રીઓમાં એક નામ પણ હતું, જે આ ક્ષણની રાહ વીસ વરસથી જોઈ રહી હતી. એ નામ એટલે અભિનેત્રી નીલમ પંચાલ.

અમદાવાદમાં જન્મીને ઊછરેલી નીલમની ઍક્ટિંગ કરિયરની શરૂઆત થઈ ઈન્ટર-કૉલેજ નાટકની સ્પર્ધાઓ થકી. વીણાવેલી, આઈએનટી અને બીજી અનેક સ્પર્ધામાં લાંબા સમય સુધી એણે અભિનય કર્યો. અભિનયક્ષમતાના જોરે એણે કમર્શિયલ નાટકોમાં કામ શરૂ કર્યું. નીલમના પરિવારમાંથી કોઈ આ ફીલ્ડમાંથી નહોતું એટલે આગળ વધવા માટે પીઠબળ કે માર્ગદર્શન નહોતું.

અમદાવાદમાં નીલમે એક દિવસ છાપામાં હિંદી ફિલ્મના ઑડિશનની જાહેરાત વાંચી. મુશ્કેલી એ હતી કે ઑડિશનસ્થળે પહોંચવાના એની પાસે પૈસા નહોતા એટલે એણે અડધો રસ્તો ચાલીને કાપ્યો અને એ પછી બાકીની બસમાં મુસાફરી કરી. પછી ઑડિશન તો આપ્યું, પણ ઘરમાં ટેલિફોન પણ નહીં એટલે પડોશીનો નંબર આપ્યો. ઑડિશનમાં એ ટેલેન્ટના દમ પર સિલેક્ટ તો થઈ, પણ નીલમનો ફિલ્મપ્રવેશ એટલો સરળ નહોતો.