போய்க் களம்

இது ஒரு ஒரிஜினல் தர்மயுத்தம்

சித்ரவதை செய்தோருக்கு சட்டத்தின் முன் தண்டனை?

கடந்த ஆறு அத்தியாயமா வீரப்பன் காடு-மலைப் பகுதியில் அன்றாடங்காய்ச்சிகளா வாழ்ந்துக்கிட்டிருந்த அப்பாவி பொண்டு, புள்ளைகள தமிழ்நாடு -கர்நாடகா ரெண்டு மாநில எஸ்.டி.எப்.ல சில ஓநாய்கள், வனச்சரகர்க எல்லாம் சேர்ந்து கும்மியடிச்சத அவங்க... அவங்க வாயாலேயே பேசுனத எழுத்தா பாத்தீங்க. சரி, இத்தன கொடும் நடந்திருக்கு... எல்லாம் நடந்தும் ஒரு பொம்பள ஆட்சியிலதான். அவங்க இத கண்டுக்கிட்டாங்களா... கண்டுக்கிடலியா...? கேள்வி வரும்ல.

ம்க்கும்.. நல்லா கண்டுக்கிட்டாய்ங்க. பச்சைக்கொடி காட்டுனதே அவாளுதான். மலைமக்களுக்கு நேர்ந்த அத்தன கொடுமைகளுக்கும் ஜவாப்தாரி மேடம்... மைசூர் மகாராணி...அல்லி தர்பார் நடத்துன சாட்சாத் ஜெயலலிதாதான்.

அந்தக் கொடுமைய எங்க போய்ச் சொல்ல. இத கேட்டா...ஒரு படவாவும் வாய் தொறக்கமாட்டான். ஏன்னா...அவன் வீட்டு பொம்பளைங்களுக்கு இந்த கதி நேரல... நாசமா போவாய்ங்க... கொள்ளையில போவாய்ங்க...அவிய்ங்க பாம்பு கடிச்சுதான் சாவாய்ங்க, இல்ல பெரிய ஆக்ஸிடெண்டல செத்துப்போவாய்ங்க. வயிறெரிஞ்சு சொல்றேன்... எத்தனக் கொடூரம் பண்ணியிருக்காங்க!

இந்தக் கொடுமைகள தட்டிக்கேட்ட, பழங்குடிமக்கள் சங்கம் சார்பா எங்க மூத்த வழக்கறிஞர் ப.பா.மோகன், சதாசிவா கமிஷன் ரிப்போர்ட் என்ன ஆச்சு... என்ன எழவுன்னு அவரே சொல்றாரு கேளுங்க...

சுதந்திர இந்திய வரலாற்றில் ஆளும் அரசுகள் தங்கள் சட்டத்தின் ஆட்சிக்கு மாறாக ஆதிக்க சக்திகளுக்கும், சொத்துடமைதாரர்களுக்கும் சாதகமாக எளிய மக்களுக்கு எதிராக தொடுக்கப்படும் வன்முறையின் ஒரு பகுதியே அவர்களை சித்ரவதைகள் செய்து குரூர மனத்துடன் ரசிப்பது. சித்ரவதையின் பல வடிவங்கள் சுதந்திரத்திற்கு முன்பும், பின்பும் பலவடிவங்களில் நிகழ்த்தியிருக்கிற கொடுமைகளைச் சான்றுகளாக வரலாற்றில் படித்திருக்கிறோம்.

ஜனநாயகத்தில் மக்கள்தான் எஜமானர்கள். அரசும், அரசு அதிகாரிகளும், அமைச்சர்களும்... ஏன்? முதல் குடிமகனான ஜனாதிபதி, ஆளுநர்கள் அனைவருமே மக்கள் ஊழியர்கள்தான்.