பிரம்மாண்டத்தால் திவாலான ஆன்லைன் கல்வி நிறுவனம்!

ஒரு நிறுவனம் தொடங்கப்பட்ட சில ஆண்டுகளிலேயே மிகப்பெரிய உச்சத்தைத் தொட்டு, ஆச்சர்யப்படுத்தி, அடுத்த சில ஆண்டுகளிலேயே அதலபாதாளத்துக்கு சரிவடைவது, பைஜூஸ் நிறுவனத்துக்கு பொருந்தும். ஆன்லைன் கல்வி முறையை அடிப்படையாகக் கொண்டு 2011ஆம் ஆண்டில் பெங்களூருவில் பைஜூ ரவீந்திரன் என்பவர் தொடங்கப்பட்ட ஆன்லைன் கல்விக்கான பைஜூஸ் நிறுவனம், 22 பில்லியன் டாலர் சொத்து மதிப்புடன் உச்சத்தை எட்டிப்பிடித்து, அடுத்த சில ஆண்டுகளில் அன்னியச் செலவாணி மோசடி, வங்கி மோசடி, இந்திய கிரிக்கெட் வாரியத்திடம் தகராறு என பல்வேறு விவகாரங்களால் அதன் முதலீட்டாளர்கள், பைஜூ நிறுவனரையே நிறுவனத்தை விட்டு வெளியேறும்படி குரலெழுப்ப வைத்திருக்கிறது!

- தெ.சு.கவுதமன்

2015ஆம் ஆண்டில் தீவிரமாக ஆன்லைன் கல்வி முறையில் இறங்கிய பைஜூஸ் நிறுவனத்திற்கு, கொரோனா பொதுமுடக்கம் ஜாக்பாட் போல அமைந்தது. கொரோனா பொதுமுடக்க காலத்தில் லட்சக்கணக்கான தொழில் நிறுவனங்கள் தங்கள் வருமானத்தை இழந்து நிறுவனத்தை மூடிய மோசமான சூழலில், அந்த பொதுமுடக்கத்தால் கல்வி நிறுவனங்களும் மூடப்பட்டு, ஆன்ட்ராய்டு போன் மூலமாக ஆன்லைனில் கல்வி கற்பிக்கப்பட்ட சூழலில், பைஜூஸ் நிறுவனத்துக்கு பெரும் வரவேற்பு கிடைத்தது. அதோடு, நீட் தேர்வு உள்ளிட்ட பல்வேறு நுழைவுத்தேர்வுகளுக்கும் பைஜூஸ் ஆன்லைனில் பாடம் நடத்தியது. அந்த நிறுவனத்தில் ஆன்லைன் கல்வி கற்பதற்காக பலரும் குவிந்த நிலையில், இந்தியா முழுவதும் நானூறுக் கும் மேற்பட்ட ஆஃப்லைன் கல்வி கற்கும் மையங்களையும் தொடங்கியது. இதன் காரணமாக நிறுவனத்தின் சந்தை மதிப்பு 22 பில்லியன் டாலர் எனும் அளவுக்கு உயர்ந்தது. போர்ப்ஸ் உலக பணக்காரர்கள் வரிசையில் பைஜூ ரவீந்திரன் இடம்பிடித்தார். மிகக்குறுகிய காலத்தில் உச்சம் தொட்டவர், அதே வேகத்தில் சரிவடைந்த சம்பவமும் நடந்தது.