பசுக் காவலர்களால் மாணவர் கொலை! பதட்டத்தில் ஹரியானா!

பசுமாடுகளை வாகனங்களில் ஏற்றிச் செல்பவர்கள் மாட்டிறைச்சியை எடுத்துச் செல்பவர்கள் மீதெல்லாம் தாக்குதல் நடத்திவந்த பசுக்காவலர்கள் என்ற கும்பல், தற்போது துப்பாக்கிச்சூடு வரை சென்றுள்ளது அதிர்ச்சியை ஏற்படுத்தியுள்ளது.

- தெ.சு.கவுதமன்

ஹரியானா மாநிலம் ஃபரிதாபாத்தில் 12ஆம் வகுப்பு மாணவர் ஒருவர், மாடு கடத்தல்காரர் என்று தவறாகக் கருதப்பட்டு சுட்டுக்கொல்லப்பட்டார்! ஆர்யன் மிஸ்ரா என்ற 19 வயது மாணவர், தனது நண்பர்களான ஹர்ஷித் மற்றும் ஷங்கியுடன் ஆகஸ்ட் 23ம் தேதி நள்ளிரவில் நூடுல்ஸ் சாப்பிடுவதற்காக டஸ்டர் காரில் கடைவீதிக்கு சென்றிருக்கிறார். அதேவேளை, பசுக்காவலர்கள் எனக் கூறிக்கொள்ளும் இந்துத்வா ஆசாமிகள் சிலருக்கு, பசு மாடுகளைக் கடத்தும் கடத்தல்காரர்கள் டஸ்டர் காரில் பயணிப்பதாகத் தகவல் கிடைத்துள்ளது. மாணவர்கள் பயணித்த டஸ்டர் கார் இந்த இந்துத்வா ஆசாமிகளின் கண்களில் பட, இதில் தான் பசு கடத்தல்காரர்கள் இருக்கிறார்கள் என நினைத்திருக்கிறார்கள்.