ஊழல் ஆதாரங்களை திரட்டும் விஜய்?

இலவசத் திட்டங்களையும் அறிவிப்புகளையும் மட்டுமே அவர் தனது தேர்தல் நேர டெக்னிக் காகப் பயன்படுத்தவிருக்கிறார் என்கிறார்கள்.

"ஒன்றிய அரசின் நிதி ஆணையத்தினர் தமிழகம் வருகிறார்களே?"

"ஒன்றிய அரசின் 16ஆவது நிதி ஆணையத்தின் தலைவர் மற்றும் உறுப்பினர்கள் தமிழகத்திற்கு 17ஆம் தேதி வருகிறார்கள். அவர்கள் தமிழகத்தில் 4 நாட்கள் இருக்கிறார்கள். இவர்களின் ஆலோசனைக் கூட்டம் கோட்டையில் நடக்கிறது. அதில் முதல்வர், அமைச்சர்கள் மற்றும், நிதித்துறைச் செயலாளர், தமிழ்நாடு திட்டக்குழு உறுப்பினர்கள், துறை வாரியான ஐ.ஏ.எஸ். அதிகாரிகள் ஆகியோர் கலந்துகொள்கிறார்கள்."

"நல்லது."

"நிதி சார்ந்த பல பிரச்சனைகள் பற்றி தமிழக திட்டக் குழுவுக்கு நிறைய தெரியும். அதனால் திட்டக்குழு துணைத் தலைவர் ஜெயரஞ்சன், அதுகுறித்துப் பேசினால் சிறப்பாக இருக்கும் என்று அரசுத் தரப்பு கருதுகிறது. ஆனால், இந்தக் கூட்டத்தில் திட்டக்குழு துணைத் தலைவர் ஜெயரஞ்சனை பேச அனுமதிப்பார்களா? என்கிற சந்தேகம் இப்போதே நிதித்துறை வட்டாரங்களில் எழுப்பப்படுகிறது. ஆலோசனைக் கூட்டங்கள் முடிந்ததும், நிதி ஆணையத்தின் தலைவர் மற்றும் உறுப்பினர்களை ஃபீல்ட் விசிட்டுக்கு அழைத்துச் செல்லவும் நிதித்துறையினர் திட்டமிட்டிருக்கிறார்கள். அதாவது, தமிழகத்தில் நடைமுறையில் இருக்கும் கடல் நீரைக் குடிநீராக்கும் திட்டம் உள்ளிட்ட, ஒன்றிய அரசின் திட்டங்களை நேரில் அழைத்துச் சென்று காட்ட இருக்கிறார்கள். இதற்கிடையே, நிதி ஆணையத்தின் அதிகாரிகள் அனைவரையும் தனி விமானத்தில் மதுரைக்கு அழைத்துச் சென்று, அங்கிருந்து கீழடி அகழாய்வு மையத்தை அவர்களுக்குச் சுற்றிக்காட்டவும் திட்டமிட்டிருக்கிறார்கள். டெல்லியிலிருந்து வரும் அதிகாரிகள் ஒவ்வொருவரையும் கவனித்துக் கொள்ள ஐ.ஏ.எஸ். அதிகாரிகளை நியமித்துள்ளது தி.மு.க. அரசு. அதேபோல் இந்த ஆணையத்தினர், தேர்தல் ஆணையத்தால் அங்கீகரிக்கப்பட்ட மற்றும் பதிவு செய்யப்பட்ட அரசியல் கட்சிகளின் பிரதிநிதிகளுடன் ஒரு ஆலோசனைக் கூட்டத்தையும் நடத்தவிருக்கிறார்கள்."

"ஓவியர் டிராட்ஸ்கி மருதுக்கு தி.மு.க. அரசு பொறுப்பு ஒன்றைக் கொடுத்திருக்கிறதே?"

"தமிழ்நாடு அரசின் திரைப்பட மற்றும் தொலைக்காட்சி பயிற்சி நிறுவனத்தலைவராக ஓவியர் டிராட்ஸ்கி மருது நியமிக்கப்பட்டிருக்கிறார். டிராட்ஸ்கி மருதுக்குப் பொறுப்பு வழங்கப்பட்டதில் கலைத்துறையினர் மகிழ்ச்சியில் திளைக்கிறார்கள்."