రిటైర్డ్ అధికారులను మేపుతున్న ఎస్సీ కార్పొరేషన్

• రిటైర్డ్ ఐ.ఎ.ఎస్ టి. విజయ్ కుమారు రూ.83 వేలు.. రిటైర్డ్ పశుసంవర్ధక శాఖ డైరెక్టర్ లక్ష్మారెడ్డికి రూ.86 వేలు ఇక్కడ నెలసరి జీతం 

• “దళిత బంధు"కు అడ్వైజర్ గా ఒకరు, కన్సల్టెంట్ గా మరొకరు 

• కార్పొరేషన్ సొమ్ముతో చెరొక్క ఇన్నోవా కారు.. వీళ్ళ చాకీరికి ఇంటి వద్ద పలువురు నౌకర్లు...

• గడిచిన 2022 ఏప్రిల్ నుండి నేటి వరకు వీళ్లను మేపుతున్న రాష్ట్ర ఎస్సీ కార్పొరేషన్

• మంత్రులు భట్టి, దామోదర తక్షణమే స్పందించాలని కోరుతున్న దళిత సంఘాలు

దళితులకు అందాల్సిన సబ్సిడీల సొమ్ము వీళ్ళ జీతాలకు కరగనాడుతున్న వైనం..

పెరుమాళ్ళ నర్సింహారావు ఆదాబ్ హైదరాబాద్ ప్రత్యేక ప్రతినిధి ఫిబ్రవరి 24 (ఆదాబ్ హైదరాబాద్): 'తాను దూర సందు లేదు..మెడకో డోలు' అన్న సామెత మాదిరిగా ఉంది ప్రస్తుతం తెలంగాణ రాష్ట్ర ఎస్సీ కార్పోరేషన్ పరిస్థితి. 'గతమెంతో ఘనం..భవిష్యత్తు సందిగ్ధం' అనే మాట ఇక్కడ కొనసాగుతోంది.కొంచెం లోతుగా పరిశీలిస్తే.. నాటి ఉమ్మడి ఆంధ్రప్రదేశ్ కాంగ్రెస్ ప్రభుత్వంలో మంత్రులుగా పనిచేసిన దామోదర రాజనర్సింహ, గీతారెడ్డితో పాటు పలువురు దళిత నేతలు నాటి ముఖ్యమంత్రి కిరణ్ కుమార్ రెడ్డితో తలపడి, జనవరి 2013లో ఎస్సీ, ఎస్టీ సబ్ ప్లాన్ చట్టాన్ని సాధించారు. అనంతరం ఏర్పాటైన నూతన తెలంగాణ ప్రభుత్వం ఈ చట్టానికి బలం చేకూర్చకుండా, సరైన నిబంధనలను రూపొందించకుండా చట్టాన్ని నిర్వీర్యం చేస్తూ వచ్చింది. విభజన తర్వాత పక్కన ఉన్న ఆంధ్రప్రదేశ్ రాష్ట్రంలో మాత్రం సబ్ ప్లాన్ నిబంధనలను రూపొందించి అక్కడి ప్రభుత్వాలు అమలు చేస్తున్నాయి. సరైన విధంగా రూపొందించిన నియమాలు లేనప్పుడు ఎస్సీ ఎస్టీ సబ్ ప్లాన్ చట్టాన్ని పాటించన వసరం లేదన్నట్లుగా గత బిఆర్ఎస్ ప్రభుత్వం అనుసరించింది.ఈ లోసుగులను అడ్డుపెట్టుకొని 2016 -17 ఒక్క ఆర్థిక సంవత్సరంలోనే ఎస్సీ, ఎస్టీ సబ్ ప్లాన్ నిధులకు కేటాయించిన రూ.3 కోట్లలో రూ.7,875 కోట్లు కేవలం మిషన్ కాకతీయ, మిషన్ భగీరథకు వినియోగించారు.