மாறும் போர்க்களம்

உலக நாடுகளை அதிர வைத்த புதிய வன்முறை

ஹிஸ்புல்லா அமைப்பினர் பயன்படுத்திய ஆயிரக்கணக்கான பேஜர் கருவிகள் ஒரே நேரத்தில் வெடித்து சிதற, 3000க்கும் மேற்பட்டோர் ரத்த வெள்ளத்தில் சாய்ந்தனர். இந்த தாக்குதலில் உயிர் பலி 12.

உலகில் எந்த நாட்டிலும் இது வரை நடக்காத புதிய வகை தாக்குதலை சந்தித்த லெபனான் மக்கள் நிலை குலைந்து போயுள்ளனர்.

ஹிஸ்புல்லா அமைப்பினரை குறிவைத்து நடத்தப்பட்ட இந்த மின்னணு யுத்தத்தின் சூத்ரதாரி இஸ்ரேல்தான் என்பது எல்லோருக்கும் புரிந்தது. வேவு பார்த்தால், மின்னணு யுத்த முறையில் இஸ்ரேல் அந்த அளவுக்கு கில்லாடி.

பாலஸ்தினத்தின் காசா மீது தாக்குதல் நடத்தும் இஸ்ரேலுக்கு எதிராக ஹிஸ்புல்லா களம் இறங்கி, தொடர் தாக்குதல்கள் நடத்தி வருகிறது. இதற்கு அவ்வப்போது இஸ்ரேல் பதிலடி கொடுத்து வந்துள்ளது. இப்போது, ஹிஸ்புல்லா அமைப்பு மீது முழு அளவில் தாக்குதல் நடத்துவதன் தொடக்கமாகவே இந்த பேஜர் வெடிப்பு சம்பவம் உலக நாடுகளால் பார்க்கப்பட்டது. முதல் நாள் பேஜர்கள் வெடித்த சம்பவம் நடந்த நிலையில், அடுத்த நாள் ஹிஸ்புல்லா பயன்படுத்திய வாக்கி டாக்கிகள் திடீரென வெடித்தன. இதில் 25 பேர் பலியாகிவிட, 450 பேருக்கு காயம் ஏற்பட்டது. இதைத் தொடர்ந்து சோலார் சார்ஜர்கள் சில இடங்களில் வெடித்தன.