ஆம்ஸ்ட்ராங் கொலை வழக்கில் 90 நாட்களில் எழும்பூர் நீதிமன்றத்தில் 30 பேர் மீது 5 ஆயிரம் பக்கம் குற்றப்பத்திரிக்கை தாக்கல்

முதன்மை குற்றவாளிகளாக ரவுடிகள் நாகேந்திரன், சம்பவ செந்தில், அஸ்வத்தாமன் இடம்பெற்றுள்ளனர் | 29 பேருக்கும் விரைவில் தண்டனை பெற்று தர பெருநகர காவல்துறை முயற்சி

பகுஜன் சமாஜ் கட்சியின் மாநில தலைவர் ஆம்ஸ்ட்ராங் கொலை வழக்கில் சென்னை பெருநகர காவல்துறை 90 நாட்களில் விரைந்து செயல்பட்டு கைது செய்யப்பட்ட குற்றவாளிகள் உள்பட 30 பேர் மீது நேற்று எழும்பூர் நீதிமன்றத்தில் 5 ஆயிரம் பக்கங்கள் கொண்ட குற்றப்பத்திரிகையை தாக்கல் செய்துள்ளது. இந்த வழக்கில் முதன்மை குற்றவாளிகள் நாகேந்திரன், சம்பவ செந்தில், அஸ்வத்தாமன் ஆகியோர் இடம் பெற்றுள்ளனர்.

பகுஜன் சமாஜ் கட்சியின் மாநில தலைவர் ஆம்ஸ்ட்ராங் (51), கடத்த ஜூலை 5ம் தேதி வீட்டின் அருகே கொடூரமான முறையில் வெட்டி படுகொலை செய்யப்பட்டார்.

தொடர்ந்து ஆம்ஸ்ட்ராங் கொலை தொடர்பாக பிரபல ரவுடி ஆற்காடு சுரேஷ் சகோதரர் பொன்னை பாலு உள்பட 11 பேர் அடுத்தடுத்து அண்ணாநகர் காவல் நிலையத்தில் சரணடைந்தனர். மேலும், வழக்கில் தொடர்ந்தவர்களை கைது செய்ய புதிய போலீஸ் கமிஷனர் அருண் மேற்பார்வையில் சென்னை வடக்கு மண்டல கூடுதல் கமிஷனர் நரேந்திரன் நாயர் தலைமையில் இணை கமிஷனர் விஜயகுமார், ஒரு துணை கமிஷனர், 4 உதவி கமிஷனர்கள், 10 இன்ஸ்பெக்டர்கள் உள்பட 50 பேர் கொண்ட 10 தனிப்படைகள் அமைக்கப்பட்டது. முன்னாள் பாஜ மாவட்ட மகளிர் அணி செயலாளராக இருந்த ரவுடி ஆற்காடு சுரேஷ் காதலியான அஞ்சலை, முன்னாள் அதிமுக வழக்கறிஞர் அணியை சேர்ந்த பிரபல ரவுடி தோட் டம் சேகர் மனைவி மலர் கொடி, முன்னாள் தமாகா வழக்கறிஞர் அணியை சேர்ந்த ஹரிதரன், முன்னாள் இளைஞர் காங்கிரஸ் மாநில பொதுச்செயலாளர் அஸ்வத்தாமன், முன்னாள் அதிமுக கவுன்சிலர் ஹரிகரன், வடசென்னை பிரபல ரவுடி நாகேந்திரன் உள்பட 28 பேரை தனிப்படை போலீசார் கைது செய்தனர்.

இவர்களில் கூலிப்படை தலைவன் குன்றத்தூர் திரு வேங்கடம், ஆயுதங்களை பறிமுதல் செய்ய அழைத்து சென்றபோது புழல் அருகே போலீசாரை மறைத்து வைத்திருந்த துப்பாக்கியால் சுட்டுவிட்டு தப்பிக்க முயன்றபோது என்கவுன்டர் செய்யப்பட்டது. அதேபோல், ஆம்ஸ்ட்ராங் கொலைக்கு தமாகா முன்னாள் வழக்கறிஞர் அணியை சேர்ந்த ஹரிதரன் மற்றும் முன்னாள் அதிமுக வழக்கறிஞர் மலர்கொடி மூலம் கூலிப்படையாக செயல்பட்ட பொன்னை பாலு, திரு வேங்கடத்திற்கு ரூ.50 லட்சம் வரை சம்பவ செந்தில் மூலம் பணம் கொடுத்து உதவியது தெரியவந்தது. அந்த பணம் வழக்கறிஞரான மொட்டை கிருஷ்ணன் மூலம் கொடுக்கப்பட்டது என விசாரணையில் தெரியவந்தது. தலைமறைவான ரவுடி சம்பவ செந்தில் மற்றும் மொட்டை கிருஷ்ணனை போலீசார் தேடி வருகின்றனர்.