17,000 சிறப்பு பேருந்துகள் இயக்க முடிவு

சென்னையில் இருந்து 10,500 பேருந்துகள் | அமைச்சர் தலைமையில் நாளை ஆலோசனை

தீபாவளி பண்டிகையொட்டி மாநிலம் முழுவதும் 17,000 சிறப்பு பேருந்துகளை இயக்க தமிழக அரசு முடிவு செய்துள்ளது. நாளை அமைச்சர் தலைமையில் நடைபெறும் ஆலோசனை கூட்டத்திற்கு பின் அறிவிக்கப்படும் என அதிகாரிகள் தெரிவித்தனர்.

இந்த ஆண்டு தீபாவளி பண்டிகை வரும் 31ம் தேதி (வியாழக்கிழமை) கொண்டாடப்படுகிறது. அன்று அரசு விடுமுறை. அதன் பின்னர் சனி, ஞாயிறு அரசு விடுமுறை என்பதால், இடையில் வெள்ளிக்கிழமை விடுப்பு எடுத்துக்கொள்ள பலரும் திட்டமிட்டுள்ளனர்.

அதனால் அக்.31, நவம்பர் 1, 2, 3 என தொடர்ந்து 4 நாட்கள் விடுமுறை வருகிறது. தொடர் விடுமுறை வருவதால் லட்சக்கணக்கான மக்கள் தமிழகம் முழுவதும் இருந்து தங்களின் சொந்த ஊர்களுக்கு செல்ல திட்டமிட்டுள்ளனர்.

இதற்காக இம்மாத கடைசி வாரத்தில் புதன் அல்லது வியாழக்கிழமை அன்றே சொந்த ஊர்களுக்கு புறப்பட்டு செல்ல பேருந்துகள், ரயில்களில் டிக்கெட்கள் முன்பதிவு செய்ய ஆர்வம் காட்டி வருகின்றனர். ரயில்களில் ஏற்கனவே முன்பதிவு அனைத்தும் முடிந்து விட்டது. இதனால் ஊர்களுக்கு செல்ல விரும்புவர்கள் பேருந்துகளை நம்பியே இருக்க வேண்டியுள்ளது.