பஸ். ரயில்களில் மக்கள் கூட்டம்

பரனூர் சுங்கச்சாவடி, பெருங்களத்தூர், தாம்பரம், இசிஆரில் கடும் போக்குவரத்து நெரிசல்

தீபாவளி பண்டிகையை கொண்டாட சொந்த ஊர்களுக்கு சென்ற லட்சக்கணக்காணோர் சென்னைக்கு நேற்று பஸ், ரயில்களில் படையெடுக்க தொடங்கினர். இதனால் பஸ், ரயில்களில் நேற்று வழக்கத்தை விட கூட்டம் அதிகமாக இருந்தது. கார்களிலும் நிறைய பேர் திரும்பியதால் நேற்று பரனூர் சுங்கச்சாவடியிலும் பெருங்களத்தூர், தாம்பரம், ஓஎம்ஆர் சாலை, இசிஆர் பகுதியில் கடும் வாகன நெரிசல் ஏற்பட்டது. இன்று காலையும் கூட்டம் அதிகரிக்கும் என்பதால் போக்குவரத்தை சரிசெய்ய போலீசார் குவிக்கப்பட்டுள்ளனர்.

தீபாவளி பண்டிகை கடந்த 31ம் தேதி (வியாழக்கிழமை) கோலாகலமாக கொண்டாடப்பட்டது. தீபாவளி பண்டிகையை கொண்டாடும் வகையில் தீபாவளிக்கு முந்தைய நாளான புதன்கிழமை பள்ளி, கல்லூரிகளுக்கு மதியத்துக்கு மேல் அரை நாள் விடுமுறை விடப்பட்டது. தொடர்ந்து தீபாவளி பண்டிகையை முடித்து விட்டு சொந்த ஊர்களுக்கு திரும்பும் வகையில் தீபாவளி மறுநாளான வெள்ளிக்கிழமையும் விடுமுறை அளிக்கப்பட்டது. தொடர்ந்து சனிக்கிழமை, ஞாயிற்றுக்கிழமை என்று தொடர்ந்து 4 நாட்கள் விடுமுறை வந்தது. இந்த சந்தர்ப்பத்தை பயன்படுத்தியும், தீபாவளி பண்டிகையை தங்கள் குடும்பத்துடன் கொண்டாடும் வகையில் சென்னை முதல் சொந்த ஊர்களுக்கு படையெடுத்தனர். ரயில், பஸ்கள், கார்கள் என 15 லட்சம் பேர் தங்கள் சொந்த ஊர்களுக்கு புறப்பட்டு சென்றனர்.