4 வழிச்சாலையாக மாற்றப்படுமா?

மதுராந்தகம் - வெண்ணாங்குப்பட்டு வரையிலான 2 வழிச்சாலையை, 4 வழிச் சாலையாக அகலப்படுத்தப்படுமா என வாகன ஓட்டிகள், பொதுமக்கள் நீண்டகாலமாக எதிர்பார்ப்பில் உள்ளனர்.

எனவே, சம்பந்தப்பட்ட அதிகாரிகள் சாலையை அகலப்படுத்த நடவடிக்கை எடுக்க வேண்டும் என வலியுறுத்துகின்றனர்.

செங்கல்பட்டு மாவட்டம் மதுராந்தகம் நகரில் இருந்து மதுராந்தகம், சூனாம்பேடு, வெண்ணாங்குப்பட்டு வழியாக கிழக்கு கடற்கரை சாலையை இணைக்கும் சுமார் 35 கிலோமீட்டர் தொலைவிற்கான மாநில நெடுஞ்சாலை உள்ளது.

இந்த சாலையின் இருபுறங்கணிலும் 18க்கும் மேற்பட்ட கிராமங்கள் உள்ளன. குறிப்பாக மதுராந்தகம் அடுத்து மாம்பாக்கம், முதுகரை, வில்வராயநல்லூர், பையம்பாடி, பொலம்பாக்கம், சரவம்பாக்கம், சித்தாமூர், கன்னிமங்கலம், பூரியம்பாக்கம், பூங்குணம், நுகும்பல், போந்தூர், இல்லீடு உள்ளிட்ட ஊராட்சிகள் இந்த நெடுஞ்சாலை பின்புறத்திலும் மற்றும் இந்த ஊராட்சிகளின் அருகே ஏராளமான ஊராட்சிகள் மற்றும் கிராமங்கள் அமைந்துள்ளன.

இப்பகுதியை சேர்ந்த மக்கள் அனைவரும் இந்த சாலையைதான் பயன்படுத்தி வருகின்றனர். போக்குவரத்து நெரிசல் அதிகமாகி விட்ட இக்காலத்தில் இந்த சாலையை மற்ற சாலைகளைப்போல அகலப்படுத்த வேண்டும் என பயணிகளும், பொதுமக்களும் கோரிக்கை வைக்கின்றனர். குறைந்தபட்சம் நான்கு வழிச்சாலையாக அகலப்படுத்த வேண்டும் என்பதே அப்பகுதி பொதுமக்களின் கோரிக்கையாக உள்ளது.