தீபாவளி முடிந்து சென்னை திரும்பியவர்களால் தாம்பரம் ஜிஎஸ்டி சாலையில் கடும் போக்குவரத்து நெரிசல்

தீபாவளி பண்டிகை விடுமுறை முடிந்து சென்னை திரும்பிய பொதுமக்களால் தாம்பரம் ஜிஎஸ்டி சாலையில் கடும் போக்குவரத்து நெரிசல் ஏற்பட்டது.

தீபாவளி பண்டிகை தொடர் விடுமுறையை முன்னிட்டு சென்னை புறநகர் பகுதிகளில் உள்ள மாணவர்கள், சென்னை பல்வேறு நிறுவனங்களில் வேலை செய்பவர்கள், பொதுமக்கள் என ஏராளமானோர் சென்னையில் இருந்து தென்மாவட்டங்களில் உள்ள தங்களது சொந்த ஊர்களுக்கு சென்றிருந்தனர்.

இந்நிலையில் விடுமுறை முடிந்து நேற்று முன்தினம் முதல் ஏராளமான பொதுமக்கள் அரசு மற்றும் தனியார் பேருந்துகள், ரயில்கள், கார்கள், இருசக்கர வாகனங்கள் மூலம் சென்னைக்கு திரும்ப தொடங்கினர். இதனால் பெருங்களத்தூர், தாம்பரம் ஜிஎஸ்டி சாலையில் கடும் போக்குவரத்து நெரிசல் ஏற்பட்டது.