மாமல்லபுரம் அருகே நெம்மேலி குப்பத்தில் கடலரிப்பை தடுக்க நேர்கல் தடுப்பு அமைக்கும் பணி தீவிரம்

மாமல்லபுரம் அடுத்த நெம்மேலி மீனவர் குப்பத்தில் கடலரிப்பை தடுக்கும் வகையில் நேர்கல் தடுப்பு அமைக்கும் பணி தீவிரமாக நடந்து வருகிறது.

இதனிடையே, அப்பகுதியில் தூண்டில் வளைவு அமைக்க விரைந்து நடவடிக்கை எடுக்க வேண்டும் என மீனவர்கள் கோரிக்கை வைத்துள்ளனர்.

மாமல்லபுரத்தில் இருந்து சென்னை செல்லும் இசிஆர் சாலையொட்டி நெம்மேலி குப்பம் அமைந்துள்ளது. இங்கு, 200க்கும் மேற்பட்ட குடும்பங்கள் வசிக்கின்றனர். இவர்கள் முழுக்க முழுக்க மீன்பிடி தொழிலை நம்பி பிழைப்பு நடத்துகின்றனர்.

இங்கு, பல மாதங்களாக கடல் ஆக்ரோஷத்துடன் காணப்படுகிறது. இதனால், திடீரென கடலில் ராட்சத அலை எழும்பி, பல அடி தூரத்திற்கு குடியிருப்பு பகுதிக்கு அருகே முன்னோக்கி வந்து தாக்கியதில் கடலரிப்பு ஏற்பட்டு, அங்குள்ள சிமென்ட் சாலையில் விரிசல் ஏற்பட்டு, கடந்த ஆண்டு இடிந்து விழுந்தது.