3 நீர்மூழ்கி கப்பல்கள் மற்றும் 26 ரபேல் எம் போர் விமானங்கள் வாங்க அடுத்த மாதம் ஒப்பந்தம்

அடுத்த மாதம் 26 ரபேல் கடற்படை விமானங்கள், 3 ஸ்கார்பீன் நீர்மூழ்கிக் கப்பல் வாங்குவதற்கான இரு தனித்தனி ஒப்பந்தங்கள் கையெழுத்தாக இருப்பதாக கடற்படை தளபதி டி.கே.திரிபாதி கூறி உள்ளார்.

இந்திய கடற்படை தினம் நாளை நாடு முழுவதும் கொண்டாடப்பட உள்ளது. இதையொட்டி, கடற்படை தளபதி அட்மிரல் திரிபாதி டெல்லியில் நேற்று அளித்த பேட்டியில் கூறியதாவது:

பிரான்சிடம் இருந்து கடற்படைக்கான 26 ரபேல் எம் போர் விமானங்களை வாங்க பாதுகாப்பு அமைச்சகம் கடந்த ஆண்டு ஜூலை மாதம் ஒப்புதல் அளித்தது. இந்த போர் விமானங்கள் உள்நாட்டில் கட்டப்பட்ட ஐஎன்எஸ் விக்ராந்த் கப்பலில் நிலை நிறுத்தப்படும். இதே போல, பிரான்சிடம் இருந்து கூடுதலாக 3 ஸ்கார்பீன் நீர்மூழ்கிக் கப்பல்கள் வாங்கப்பட உள்ளன. ஏற்கனவே இதுபோல 6 நீர்மூழ்கிக் கப்பல்கள் கடற்படையில் உள்ளன.