வெற்றிகரமாக விண்ணில் பாய்ந்தது ஜிஎஸ்எல்வி எஃப்-12

வழிகாட்டி செயற்கைக்கோள் நிலைநிறுத்தம்

போக்குவரத்து வழிகாட்டுதலுக்கான என்விஎஸ்-01 செயற்கைக்கோளுடன் ஜிஎஸ்எல்வி எஃப்-12 ராக்கெட் வெற்றிகரமாக திங்கள்கிழமை (மே 29) விண்ணில் செலுத்தப்பட்டது.

ஆந்திர மாநிலம், ஸ்ரீஹரிகோட்டாவில் உள்ள சதீஷ் தவண் ஆராய்ச்சி மையத்தின் இரண்டாவது ஏவுதளத்தில் இருந்து காலை 10.42 மணிக்கு செலுத்தப்பட்ட அந்த ராக்கெட் திட்டமிட்டபடி இலக்கை அடைந்ததைத் தொடா்ந்து, அத்திட்டம் வெற்றி பெற்ாக அறிவிக்கப்பட்டது. இதையடுத்து விஞ்ஞானிகள் பரஸ்பரம் வாழ்த்துகளை பரிமாறிக் கொண்டனா்.

தரைவழி, கடல்வழி மற்றும் வான்வழிப் போக்குவரத்து மற்றும் பாதுகாப்பு பயன்பாட்டுக்காக ‘இந்திய மண்டல வழிகாட்டுதல் செயற்கைக்கோள் அமைப்பு’ என்ற கட்டமைப்பை (ஐஆா்என்எஸ்எஸ்) உருவாக்க இந்திய விண்வெளி ஆய்வு நிறுவனம் (இஸ்ரோ) முடிவு செய்தது. இதன்மூலம் இந்தியாவின் பயன்பாட்டுக்கென பிரத்யேக வழிகாட்டுதல் தொழில்நுட்பம் உருவாக்கப்பட்டு, செயல்பாட்டில் இருந்து வருகிறது.

அதன்படி, ரூ.1,420 கோடி செலவில் ஐஆா்என்எஸ்எஸ் 1ஏ, 1பி, 1சி, 1டி, 1இ, 1எப், 1ஜி என 7 வழிகாட்டு செயற்கைக்கோள்கள் வடிவமைக்கப்பட்டு கடந்த 2013 முதல் 2016-ஆம் ஆண்டு வரையான காலகட்டங்களில் வெற்றிகரமாக விண்ணில் நிலைநிறுத்தப்பட்டன.

அவற்றில், குறிப்பிட்ட காலத்துக்குப் பிறகு செயலிழந்த செயற்கைக்கோள்களுக்கு மாற்றாக புதிய செயற்கைக்கோள்கள் அனுப்பப்பட்டு வருகின்றன.

அந்த வகையில், ஐஆா்என்எஸ்எஸ் 1-ஜி செயற்கைக்கோளுக்கு மாற்றாக என்விஎஸ்-01 செயற்கைக்கோளை இஸ்ரோ வடிவமைத்தது. அதை ஜிஎஸ்எல்வி எஃப்-12 ராக்கெட் மூலம் விண்ணில் செலுத்த முடிவு செய்தது.

அதற்கான இறுதிக்கட்டப் பணிகள் நிறைவடைந்து 27.30 மணி நேர கவுன்ட்டவுன் கடந்த ஞாயிற்றுக்கிழமை தொடங்கியது. அதன் தொடா்ச்சியாக ஸ்ரீஹரிகோட்டாவில் இருந்து திங்கள்கிழமை அந்த ராக்கெட் விண்ணில் செலுத்தப்பட்டது.