வடமாநிலங்களில் கனமழை: பிரதமர் ஆலோசனை

நாட்டின் பல்வேறு பகுதிகளில் பருவமழை தீவிரமடைந்துள்ளதையடுத்து, சூழலைத் தொடா்ந்து கண்காணித்து உரிய நடவடிக்கைகளை மேற்கொள்ளுமாறு மூத்த அமைச்சா்களுக்கும், உயரதிகாரிகளுக்கும் பிரதமா் நரேந்திர மோடி வலியுறுத்தியுள்ளாா்.

புது டில்லி ஜூலை 10: நாட்டில் தாமதமாகத் தொடங்கிய தென்மேற்குப் பருவமழை தற்போது பல்வேறு பகுதிகளில் தீவிரமடைந்துள்ளது. முக்கியமாக, கேரளம், கா்நாடகம், வடமாநிலங்களான தில்லி, ஹிமாசல், உத்தரகண்ட் உள்ளிட்ட மாநிலங்களில் கனமழை பெய்து வருகிறது. அதனால், யமுனை உள்ளிட்ட நதிகளில் வெள்ளப்பெருக்கு ஏற்பட்டுள்ளதோடு, மலைப்பாங்கான பகுதிகளில் நிலச்சரிவும் ஏற்பட்டுள்ளது.

37 பேர் உயிரிழப்பு: வடமாநிலங்களில் கடந்த இரு நாள்களில் மழை தொடர்பான சம்பவங்களில் 37 பேர் உயிரிழந்துள்ளனர். இவர்களில் ஹிமாசலில் 18 பேரும், பஞ்சாப், ஹரியாணாவில் 9 பேரும், ராஜஸ்தானில் 7 பேரும், உத்தரபிரதேசத்தில் மூவரும் அடங்குவர்.

பிரதமா் ஆலோசனை: நாட்டின் பல்வேறு பகுதிகளில் பருவமழை தீவிரமடைந்துள்ளதையடுத்து, மூத்த அமைச்சா்கள், மத்திய அரசின் உயரதிகாரிகளுடன் பிரதமா் மோடி ஆலோசனை நடத்தினாா்.

பருவமழை சூழலைக் கண்காணித்து உரிய நடவடிக்கைகளை விரைந்து மேற்கொள்ளுமாறு அவா்களிடம் பிரதமா் மோடி வலியுறுத்தியதாக பிரதமா் அலுவலகம் வெளியிட்ட ட்விட்டா் பதிவில் குறிப்பிடப்பட்டுள்ளது.

உள்ளூா் அதிகாரிகள், தேசிய பேரிடா் மீட்புப் படையினா், மாநில பேரிடா் மீட்புப் படையினா் உள்ளிட்டோா் பருவமழையால் பாதிக்கப்பட்டவா்களுக்கான நிவாரண உதவிகளை விரைந்து வழங்கி வருவதாகவும் பிரதமா் அலுவலகம் தெரிவித்துள்ளது.