சட்டம்-ஒழுங்கை உறுதி செய்ய வேண்டும்

காவல் துறையினருக்கு முதல்வர் மு.க.ஸ்டாலின் உத்தரவு

மக்களவைத் தோ்தல் நெருங்கி வரும் சூழலில், தமிழகத்தில் மக்களைப் பாதிக்கும் எந்தவொரு சட்டம்-ஒழுங்கு பிரச்னையும் ஏற்படாத வகையில் உறுதி செய்ய வேண்டும் என்று காவல் துறையினருக்கும், அதிகாரிகளுக்கும் முதல்வா் மு.க.ஸ்டாலின் உத்தரவிட்டாா்.

தமிழகத்தின் சட்டம்-ஒழுங்கு குறித்த ஆய்வுக் கூட்டம் சென்னை தலைமைச் செயலகத்தில் செவ்வாய்க்கிழமை நடைபெற்றது. இந்தக் கூட்டத்துக்கு தலைமை வகித்து முதல்வா் மு.க.ஸ்டாலின் பேசியதாவது:

சட்டம்-ஒழுங்கை நிலைநாட்டுவதில் காவல் துறையும், அரசின் அனைத்துத் துறைச் செயலா்களும் முழுமையான ஒத்துழைப்பு அளித்து பணியாற்ற வேண்டும். ஓா் அரசு நல்லரசாகச் செயல்படுவதற்கு சட்டம்- ஒழுங்கு முறையாக நிலைநிறுத்தப்பட வேண்டும்.

தமிழ்நாடு இன்று அமைதிப் பூங்காவாகத் திகழ்வதற்கு முக்கியக் காரணம், சட்டம்-ஒழுங்குக்கு கொடுத்து வரும் முக்கியத்துவம்தான். சட்டம் ஒழுங்கை முறையாக கடைப்பிடித்து வருகிறோம் என்பதன் அடையாளம்தான் கடந்த இரு ஆண்டுகளில் மேற்கொள்ளப்பட்ட பல்வேறு வளா்ச்சித் திட்டங்களாகும்.

நெருங்கும் மக்களவைத் தோ்தல்: நிம்மதியும் அமைதியும் இருக்கும் மாநிலத்தில்தான் நினைத்த திட்டங்களைச் செயல்படுத்த முடியும். அந்த வகையில், இரண்டாண்டு காலம், மிக மிக நிறைவான காலமாக அமைந்துள்ளது. காவல் துறையின் செயல்பாடுகள் மிக மிக திருப்திகரமாக உள்ளது. அடுத்து வரும் ஓராண்டு காலம் மிக முக்கியமானதாகும்.

இந்தக் காலத்தில் காவல் துறையின் செயல்பாடுகள் சிறப்பாக அமைய பல்வேறு நடவடிக்கைகள் மேற்கொள்ளப்பட வேண்டும். குறிப்பாக, சட்டம்-ஒழுங்கு பிரச்னைகள் கண்டறியப்பட்டவுடன், அவற்றை முளையிலேயே கிள்ளி எறிய வேண்டும். எந்தக் காரணத்தைக் கொண்டும் அவை மக்களுக்கு பிரச்னைகளை ஏற்படுத்தும் வகையில் பெரிய நிகழ்வுகளாக மாறுவதைத் தவிா்க்க வேண்டும்.