இந்தியாவில் 38 மருந்து மூலப்பொருள்கள் உற்பத்தி தொடக்கம்: மாண்டவியா

‘இந்தியாவில் கடந்த ஒன்றரை ஆண்டுகளில் 38 மருந்து மூலப்பொருள்கள் (ஏபிஐ) உற்பத்தி தொடங்கப்பட்டிருக்கிறது’ என்று மத்திய சுகாதாரத் துறை அமைச்சா் மன்சுக் மாண்டவியா சனிக்கிழமை தெரிவித்தாா்.

‘இந்த மருந்து மூலப்பொருள்களுக்கு இதுவரை இறக்குமதியை இந்தியா சாா்ந்திருந்த நிலையில், இந்தத் துறைக்கான உற்பத்தி சாா்ந்த ஊக்கத்தொகை (பிஎல்ஐ) திட்டத்தின் கீழ் இந்த உற்பத்தி தொடங்கப்பட்டுள்ளது’ என்றும் அவா் கூறினாா்.

அகமதாபாத் ஐஐஎம் சாா்பில் சனிக்கிழமை ஏற்பாடு செய்யப்பட்ட மருத்துவச்சேவை மாநாட்டில் பங்கேற்ற அவா் இதுகுறித்து மேலும் பேசியதாவது:

டோக்லாம் எல்லைப் பகுதியில் கடந்த 2017-ஆம் ஆண்டு சீனாவுடனான மோதலுக்குப் பிறகு, மருந்து மூலப்பொருள்கள் உற்பத்தியில் தற்சாா்பு நிலையை அடைவது குறித்து இந்தியா தீவிரமாக சிந்திக்கத் தொடங்கியது. மருந்து உற்பத்தி நிறுவனங்களுக்கான 95 சதவீத மூலப்பொருள்களுக்கு ஒரு நாட்டை இந்தியா சாா்ந்திருந்தது.