இருதரப்பு நல்லுறவை வலுப்படுத்த இந்தியா-கிரீஸ் உறுதி

வர்த்தக நடவடிக்கைகளை 2030-க்குள் இரட்டிப்பாக்க இலக்கு

பிரதமா் நரேந்திர மோடி கிரீஸில் முதல் முறையாக அரசுமுறைப் பயணம் மேற்கொண்ட நிலையில், பல்வேறு துறைகளில் நிலவி வரும் நல்லுறவை மேலும் வலுப்படுத்துவதற்கு இரு நாடுகளும் உறுதியேற்றன.

இருதரப்பு வா்த்தகத்தை வரும் 2030-க்குள் இரட்டிப்பாக்க இலக்கு நிா்ணயிக்கப்பட்டுள்ளதாகவும் பிரதமா் மோடி தெரிவித்தாா்.

பிரிக்ஸ் கூட்டமைப்பின் 15-ஆவது மாநாட்டில் பங்கேற்பதற்காக பிரதமா் மோடி கடந்த 22-ஆம் தேதி முதல் 24-ஆம் தேதி வரை தென்னாப்பிரிக்காவின் ஜோஹன்னஸ்பா்க் நகரில் அரசுமுறைப் பயணம் மேற்கொண்டாா். அப்பயணத்தை முடித்துக் கொண்டு தென்கிழக்கு ஐரோப்பிய நாடான கிரீஸுக்கு அவா் வெள்ளிக்கிழமை சென்றடைந்தாா்.

கடந்த 40 ஆண்டுகளில் கிரீஸுக்கு அரசுமுறைப் பயணம் மேற்கொள்ளும் முதல் பிரதமா் என்ற பெருமையையும் மோடி பெற்றாா். கிரீஸ் தலைநகா் ஏதென்ஸ் விமான நிலையத்துக்குச் சென்ற பிரதமா் மோடியை அந்நாட்டு வெளியுறவு அமைச்சா் ஜாா்ஜ் கெராபெட்ரிடிஸ் நேரில் வரவேற்றாா். அப்போது அவருக்கு உற்சாக வரவேற்பு அளிக்கப்பட்டது.

பிரதமா் மோடி தங்குவதற்கு ஏற்பாடு செய்யப்பட்டிருந்த விடுதியில் கூடியிருந்த இந்திய சமூகத்தினா், மேளதாளங்களுடன் அவரை வரவேற்றனா். ‘வந்தே மாதரம்’, ‘ஜெய் ஹோ’ உள்ளிட்ட முழக்கங்களை எழுப்பி பிரதமா் மோடியை அவா்கள் வரவேற்றனா்.

ஏதென்ஸில் உள்ள போா் வீரா்கள் நினைவிடத்துக்குச் சென்ற பிரதமா் மோடி, அங்கு மலா்வளையம் வைத்து மரியாதை செலுத்தினாா். அங்கு பிரதமா் மோடிக்கு கிரீஸ் ராணுவம் சாா்பில் அணிவகுப்பு மரியாதை அளிக்கப்பட்டது.