பழங்குடியினர் இடையே குழப்பம் விளைவிக்கும் காங்கிரஸ்

பிரதமர் மோடி குற்றச்சாட்டு

பழங்குடியினா் நலனில் எந்த அக்கறையும் காட்டாத காங்கிரஸ் கட்சி, அச்சமூகத்தினா் மத்தியில் குழப்பத்தை விளைவிக்கிறது என்று பிரதமா் நரேந்திர மோடி குற்றம்சாட்டினாா்.

நாட்டின் எதிா்காலத்துக்கான செயல்திட்டம் எதுவும் காங்கிரஸிடம் இல்லை என்றும் அவா் சாடினாா்.

மத்திய பிரதேசத்தில் மொத்தமுள்ள 230 தொகுதிகளுக்கு வரும் 17-ஆம் தேதி ஒரே கட்டமாக பேரவைத் தோ்தல் நடைபெறவிருக்கிறது. இதில் ஆளும் பாஜகவும், பிரதான எதிா்க்கட்சியான காங்கிரஸும் பலப்பரீட்சை நடத்துகின்றன. இந்த மாநிலத்தில் 47 தொகுதிகள் பழங்குடியினருக்கு ஒதுக்கப்பட்டவையாகும்.

பழங்குடியினா் அதிகம் வாழும் சியோனி மாவட்டத்தில் ஞாயிற்றுக்கிழமை நடைபெற்ற பாஜக பொதுக்கூட்டத்தில் பிரதமா் மோடி பங்கேற்றுப் பேசியதாவது:

கடந்த 2014-ஆம் ஆண்டு வரையிலான காங்கிரஸ் ஆட்சியில், கோடிக்கணக்கான மதிப்பில் ஊழல்கள் நடைபெற்றன. ஆனால், பாஜக ஆட்சியில் எந்த ஊழலும் நிகழவில்லை. இதனால் சேமிக்கப்பட்ட பணம், ஏழை மக்களுக்கு இலவசமாக உணவு தானியங்கள் விநியோகிக்க செலவிடப்பட்டு வருகிறது.

கரோனா காலகட்டத்தில் பட்டினியில் இருந்து ஏழை மக்களைக் காக்க நியாயவிலைக் கடைகளில் இலவசமாக உணவு தானியங்கள் வழங்கும் திட்டம் தொடங்கப்பட்டது.

80 கோடி ஏழை மக்கள் பலனடையும் இத்திட்டம், மேலும் 5 ஆண்டுகளுக்கு நீட்டிக்கப்படவுள்ளது. நான் ஏழைக் குடும்பத்தில் இருந்து வந்தவன் என்பதால், அவா்களின் பிரச்னையை என்னால் புரிந்துகொள்ள முடியும்.