சென்னையில் அனைத்துக் குடும்ப அட்டைதாரர்களுக்கும் ரூ.6,000 - அமைச்சர் தங்கம் தென்னரசு

மிக்ஜம் புயலால் பாதிக்கப்பட்ட சென்னை மாவட்டத்தைச் சேர்ந்த அனைத்துக் குடும்ப அட்டைதாரர்களுக்கும் நிவாரண நிதியாக ரூ. 6,000 வழங்கப்படும் என்றும், டிசம்பர் 16-ஆம் தேதிமுதல் அதற்காக டோக்கன் விநியோகம் செய்யப்படும் என்றும் நிதியமைச்சர் தங்கம் தென்னரசு கூறினார்.

திருவள்ளூர், செங்கல்பட்டு, காஞ்சிபுரம் ஆகிய மாவட்டங்களிலும் பாதிக்கப்பட்டோருக்கு நிவாரணம் வழங்கப்படும் எனவும் அவர் கூறினார்.

இது தொடர்பாக அவர் சென்னையில் திங்கள்கிழமை அளித்த பேட்டி: மிக்ஜம் புயல் பாதிப்பின்போது எந்த அரசியலும் பார்க்காமல் அனைத்துத் தரப்பு மக்களுக்காகக் களத்தில் இறங்கி, முதல்வர் மு.க.ஸ்டாலின் பணியாற்றினார். எல்லா வகையிலும் இந்தப் பேரிடரை அரசு சமாளித்துள்ளது.

2015- வெள்ளத்தின்போது மத்திய அரசிடம் இருந்து அதிமுக அரசு ரூ. 10,250 கோடி நிவாரண நிதி கேட்டது. இப்போது ரூ. 5,060 கோடிதான் கேட்டுள்ளோம். அப்போது, அதிமுக ஆட்சியில் பாதிக்கப்பட்ட மக்களுக்கு 5,000 ரூபாய்தான் வழங்கப்பட்டது. இப்போது ரூ. 6,000 வழங்கப்பட உள்ளது.