பத்மஸ்ரீ விருதை திருப்பி அளித்தார் மல்யுத்த வீரர் பஜ்ரங் புனியா - மல்யுத்த சம்மேளன தேர்தல் முடிவு எதிரொலி

இந்திய மல்யுத்த தலைவராக, பிரிஜ் பூஷண்சிங் சரணின் நெருங்கிய ஆதரவாளர் சஞ்ஜய் சிங் தேர்வானதற்கு எதிர்ப்பு தெரிவித்து, இந்திய மல்யுத்த வீரர் பஜ்ரங் புனியா, தனக்கு அளிக்கப்பட்ட பத்மஸ்ரீ விருதை வெள்ளிக்கிழமை திருப்பி அளித்தார்.

பிரதமர் நரேந்திர மோடியை நாடாளுமன்றத்தில் நேரில் சந்தித்து அதை திருப்பி அளிப்பதற்கு காவல்துறையினர் அனுமதி மறுத்ததை அடுத்து, பிரதமர் இல்லத்தின் நடைபாதைப் பகுதியில் அந்த விருதையும், தனது கடிதத்தையும் வைத்துவிட்டு திரும்பினார் பஜ்ரங் புனியா.

இது பஜ்ரங் புனியாவின் தனிப்பட்ட முடிவு எனத் தெரிவித்துள்ள மத்திய விளையாட்டுத்துறை அமைச்சகம், அந்த முடிவை மாற்றிக்கொள்ளுமாறு அவரிடம் பேச்சு வார்த்தை நடத்தப்போவதாக தெரிவித்துள்ளது.

முன்னதாக, பிரதமருக்கான கடிதத்தை பஜ்ரங் புனியா 'எக்ஸ்' வலை தளத்தில் பதிவிட்டுள்ளார். அதில் கூறப்பட்டுள்ளதாவது: பிரதமர் அவர்களே, உங்களுக்குப் பல்வேறு பணிகளும் பொறுப்புகளும் இருக்கும் என்றாலும், நாட்டின் மல்யுத்தப் போட்டியாளர்களை நீங்கள் கவனிக்க வேண்டும் என்பதற்காக இந்தக் கடிதத்தை எழுதுகிறேன்.