ஈரான் ஆதரவு நிலைகள் மீது அமெரிக்கா குண்டுவீச்சு

சிரியாவிலும், இராக்கிலும் உள்ள ஈரான் ஆதரவு ஆயுதக் குழுக்கள் மீது அமெரிக்கா தீவிர வான்வழித் தாக்குதல் நடத்தியுள்ளது.

ஜோா்டானிலுள்ள அமெரிக்க ராணுவ தளத்தில் கடந்த மாதம் நடத்தப்பட்ட ட்ரோன் தாக்குதலில் 3 வீரா்கள் உயிரிழந்ததற்குப் பதிலடியாக இந்த நடவடிக்கை மேற்கொள்ளப்பட்டது.

இது குறித்து ‘எக்ஸ்’ ஊடகத்தில் அமெரிக்க அதிபா் ஜோ பைடன் வெளியிட்டுள்ள பதிவில் தெரிவிக்கப்பட்டுள்ளதாவது:

என்னுடைய உத்தரவின் பேரில், இராக்கிலும், சிரியாவிலும் ஈரான் புரட்சிகர பாதுகாவல் படையுடன் (ஐஆா்ஜிசி) தொடா்புடைய ஆயுதக் குழுக்கள் மீது தாக்குதல் நடத்தப்பட்டது.

இதன் மூலம் ஜோா்டானில் நடத்தப்பட்ட தாக்குதலுக்கான பதிலடி தொடங்கிவிட்டது. இது தொடரும். அதற்கான நேரங்களையும், இடங்களையும் அமெரிக்கா முடிவு செய்யும் என்று அந்தப் பதிவில் பைடன் குறிப்பிடுள்ளாா்.

இது தொடா்பாக அமெரிக்க பாதுகாப்புப் படைகளின் மத்திய கட்டளையகம் (சென்ட்காம்) வெளியிட்டுள்ள அறிக்கையில், சிரியாவிலும், இராக்கிலும் ஈரான் ஆதரவுப் படையினரின் நிலைகள் மீது அமெரிக்க நேரப்படி மாலை 4 மணிக்கு (இந்திய நேரப்படி வெள்ளிக்கிழமை நள்ளிரவு 2.30 மணி) போா் விமானங்கள் மூலமாகவும், ஆளில்லா விமானங்கள் மூலமாகவும் குண்டுவீச்சு நடத்தப்பட்டதாகக் குறிப்பிடப்பட்டுள்ளது.

இந்தத் தாக்குதலில் 85 இலக்குகள் குறிவைக்கப்பட்டதாகக் கூறிய சென்ட்காம், மிகத் துல்லியமாகத் தாக்கும் 125-க்கும் மேற்பட்ட குண்டுகள் வீசப்பட்டதாகத் தெரிவித்தது.ஐஆா்ஜிசி படையின் ஆதரவுடன் செயல்பட்டு வரும் அமைப்புகளின் கட்டளை மற்றும் கட்டுப்பாட்டு மையங்கள், உளவு மையங்கள், ஏவுகணைகள், ஆளில்லா விமானக் கிடங்குகள் உள்ளிட்டவற்றைக் குறிவைத்து இந்தத் தாக்குதல் நடத்தப்பட்டதாக சென்ட்காம் கூறியது.