கோவையில் நேரடியாகக் களம் காணும் திமுக!

கடந்த தேர்தலில் மார்க்சிஸ்ட் கம்யூனிஸ்ட் கட்சி வெற்றி பெற்றிருந்த கோவை தொகுதியை இந்த முறை தனதாக்கிக் கொண்டிருக்கிறது திமுக. தொகுதிப் பங்கீட்டில் திண்டுக்கல் தொகுதியை மார்க்சிஸ்ட் கம்யூனிஸ்ட் கட்சிக்கு கொடுத்துவிட்டு, கோவையை வலியப் பெற்றிருப்பதால் திமுகவின் நோக்கம் என்ன என்பது குறித்த பேச்சுகள் அரசியல் வட்டாரத்தில் எழுந்துள்ளன.

தொழில், கல்வி, மருத்துவத் துறைகளில் சிறந்து விளங்கும் கோவை, மேற்கு மண்டலத்தின் தலைநகராகக் கருதப்படுகிறது. இதுவரை நடைபெற்ற தேர்தல்களில் மேற்கு மண்டலம் அதிமுகவுக்கு சாதகமாகவே இருந்துள்ளது. சட்டப் பேரவைத் தேர்தல்களில் அதிமுகவுக்கு பலம் சேர்க்கும் பகுதியாக இருந்தாலும் கோவை தொகுதியை அதிமுக தனது கூட்டணிக் கட்சிகளுக்கே கொடுத்து வந்தது.

2014 மக்களவைத் தேர்தலில்தான் அதிமுக முதல் முறையாக கோவையில் நேரடியாகப் போட்டியிட்டது. அந்தத் தேர்தலில் மற்ற தொகுதிகளில் லட்சக்கணக்கான வாக்குகள் வித்தியாசத்தில் வெற்றி பெற்றிருந்தாலும் கோவையில் மட்டும் வெறும் 42,000 வாக்குகள் வித்தியாசத்தில்தான் அதிமுக வேட்பாளர் பி.நாகராஜன் வென்றார்.

இதற்குக் காரணம் பாஜகவின் செல்வாக்கு. இப்போதைய ஜார்க்கண்ட் ஆளுநரான சி.பி.ராதாகிருஷ்ணன் இரண்டாம் இடத்தைப் பிடித்தார். இந்தத் தேர்தலில் திமுக வேட்பாளர் கே.கணேஷ்குமாரால் மூன்றாமிடத்தையே பிடிக்க முடிந்தது.