7 தொண்டு நிறுவன ஊழியர்கள் உயிரிழப்பு

நிவாரண வாகனத்தில் இஸ்ரேல் வான்வழித் தாக்குதல்

பட்டினிச் சாவை எதிர்கொண்டுள்ள காஸா மக்களுக்கு உணவுப் பொருள்களை வழங்குவதற்காக சென்று கொண்டிருந்த தொண்டு நிறுவன வாகனத்தின் மீது இஸ்ரேல் நடத்திய வான்வழித் தாக்குதலில் அதன் 7 ஊழியர்கள் உயிரிழந்தனர்.

"வேர்ல்டு சென்ட்ரல் கிச்சன்' (டபிள்யுசிகே) அறக்கட்டளை என்ற அந்தத் தொண்டு நிறுவனத்தைச் சேர்ந்த அவர்களில் ஒருவரைத் தவிர அனைவரும் வெளிநாட்டினர்.

மிகப் பெரிய அதிர்ச்சி அலையை ஏற்படுத்தியுள்ள இந்தச் சம்பவத்தைத் தொடர்ந்து, டபிள்யுசிகே அறக்கட்டளை சேகரித்த உணவுப் பொருள்களுடன் காஸாவை நோக்கி வந்துகொண்டிருந்த நிவாரணக் கப்பல்கள் திருப்பி அழைக்கப்பட்டன.

இது குறித்து அந்த அறக்கட்டளை வெளியிட்டுள்ள அறிக்கையில் தெரிவிக்கப்பட்டுள்ளதாவது:

காஸாவில் இஸ்ரேல் ராணுவம் நடத்திய வான்வழித் தாக்குதலில் எங்களது அறக்கட்டளையைச் சேர்ந்த 7 ஊழியர்கள் கொல்லப்பட்டனர்.

உயிரிழந்தவர்களில் பிரிட்டன், ஆஸ்திரேலியா, போலந்து, பாலஸ்தீனத்தைச் சேர்ந்தவர்களும், அமெரிக்கா மற்றும் கனடா நாடுகளின் இரட்டைக் குடியுரிமை பெற்ற ஒருவரும் அடங்குவர்.

மோதல் நடைபெறாமல் அமைதியாக இருந்த பகுதி வழியாக, டபிள்யுசிகே அறக்கட்டளையின் இலச்சினை பெரிதாகப் பொறிக்கப்பட்ட வாகனங்களில் சென்றுகொண்டிருந்தபோதும் இந்தத் தாக்குதல் நடத்தப்பட்டது.