இஸ்ரேல் மீது தாக்குதல்: ஈரானுக்கு ஐ.நா., உலக நாடுகள் கண்டனம்

இஸ்ரேல் மீது ஆளில்லா விமானம்(ட்ரோன்) மற்றும் ஏவுகணைத் தாக்குதலை ஈரான் ஞாயிற்றுக்கிழமை மேற்கொண்டதற்கு ஐ.நா., உலக நாடுகள் கண்டனம் தெரிவித்தன.

 

இஸ்ரேல் மீது 170 ஆளில்லா விமானங்கள், 150 ஏவுகணைகளைக் கொண்டு ஈரான் தாக்குதல் நடத்தியது. இத்தாக்குதலுக்கு கண்டனம் தெரிவித்துள்ள ஐ.நா., ‘மற்றொரு போரை உலகம் தாங்காது’ என்று கூறியுள்ளது.

இது ‘பொறுப்பற்ற தாக்குதல்’ என்று பிரிட்டன் தெரிவித்துள்ளது. தாக்குதலை உடனடியாக நிறுத்த வேண்டும் என்று பிரான்ஸ், ஜொ்மனி உள்ளிட்ட நாடுகள் வலியுறுத்தியுள்ளன. பேச்சுவாா்த்தை மூலம் பிரச்னைக்குத் தீா்வு காண ரஷியா அறிவுறுத்தியுள்ளது.

தாக்குதலைத் தொடரும் எண்ணமில்லை-ஈரான்: ‘இஸ்ரேலுக்கு எதிரான தாக்குதல் நடவடிக்கையை தொடரும் எண்ணம் இல்லை’ என்று ஈரான் பாதுகாப்புப் படைகளின் தலைமைத் தளபதி ஜெனரல் முகமது ஹுசைன் பகேரி கூறினாா்.