கச்சத்தீவு தாரைவார்ப்பு தேசத் துரோகம்

கச்சத்தீவை தாரைவார்த்தது திமுகவும், காங்கிரஸும் செய்த தேசத் துரோகம் என்றார் பிரதமர் நரேந்திர மோடி.

திருநெல்வேலி மாவட்டம், அம்பாசமுத்திரம் அருகே உள்ள அகஸ்தியர்பட்டியில் பாஜக சார்பில் தேர்தல் பிரசாரக் கூட்டம் திங்கள்கிழமை நடைபெற்றது. இந்தக் கூட்டத்தில் பிரதமர் நரேந்திர மோடி கலந்துகொண்டு திருநெல்வேலி, தென்காசி, தூத்துக்குடி, கன்னியாகுமரி, விருதுநகர் மக்களவைத் தொகுதிகள், விளவங்கோடு சட்டப்பேரவைத் தொகுதி ஆகியவற்றில் பாஜக மற்றும் கூட்டணிக் கட்சிகள் சார்பில் போட்டியிடும் வேட்பாளர்களை ஆதரித்துப் பேசியதாவது:

மாற்றத்தின் பூமியான இங்கு பாஜகவுக்கு ஏற்பட்டுள்ள எழுச்சியைப் பார்க்கும்போது திமுக, காங்கிரஸ் அங்கம் வகிக்கும் "இந்தியா' கூட்டணிக்கு தூக்கம் தொலைந்திருக்கும்.

பாஜக தேர்தல் அறிக்கையில் பல்வேறு சிறந்த திட்டங்களை அறிவித்துள்ளோம். மோடியின் உறுதி அட்டை என்று அதைப் போற்றுகிறார்கள். ஏழை, எளியோருக்கு மேலும் 3 கோடி வீடுகள் வழங்கும் திட்டம், மீனவர்களுக்கு கடல்பாசி, முத்து உற்பத்திக்கான திட்டங்கள் உள்ளிட்டவை இடம்பெற்றுள்ளன.

தமிழ் கலாசாரத்தைப் போற்றும் பாஜகவை அனைவரும் விரும்புகிறார்கள். தமிழ் மொழிக்கு உலக அங்கீகாரம் பெற்றுத் தர பாஜக உறுதியேற்றுள்ளது.

உலக சுற்றுலா வரைபடத்தில் தமிழகம் இடம்பெறச் செய்யப்படும். திருவள்ளுவர் பண்பாட்டு மையம் என்ற கலாசார மையம் உருவாக்கப்படும்.