தபால் வாக்கு எண்ணிக்கையில் அதிக கவனம் தேவை

திமுக முகவர்களுக்கு முதல்வர் ஸ்டாலின் உத்தரவு

தபால் வாக்கு எண்ணிக்கையில் அதிக கவனம் செலுத்த வேண்டும் என்று திமுக முகவா்களுக்கு அக் கட்சியின் தலைவரும், முதல்வருமான மு.க.ஸ்டாலின் உத்தரவிட்டுள்ளாா்.

முதல்வா் ‘எக்ஸ்’ சமூகவலைதளத்தில் சனிக்கிழமை வெளியிட்ட பதிவு: வாக்கு எண்ணிக்கை முகாமுக்கு முதலில் செல்லும் ஆளாகவும், இறுதியாக வெளியேறும் ஆளாகவும் திமுகவின் வாக்கு எண்ணிக்கை முகவா்கள் இருக்க வேண்டும்.

தபால் வாக்குகள் எண்ணிக்கையில் அதிக கவனத்தை எடுத்துக் கொள்ள வேண்டும். செல்லாத வாக்குகளை செல்லத்தக்கதாகவும், செல்லத்தக்க வாக்குகளை செல்லாததாகவும் அறிவிப்பதை ஒருபோதும் ஏற்றுக் கொள்ளக் கூடாது.

எப்படி மின்னணு வாக்குப்பதிவு இயந்திர வாக்குகள் முக்கியமோ, தபால் வாக்குகளும் மிக முக்கியமானவை. எனவே, அந்த எண்ணிக்கைக்கு அதிக முக்கியத்துவம் தர வேண்டும்.

தாமதம் கூடாது: தபால் வாக்குகள் எண்ணிக்கையை எந்தக் காரணம் கொண்டும் தாமதப்படுத்தாமல் விரைவாக எண்ணி அதனுடைய முடிவுகளைத் தருவதை உறுதிசெய்ய வேண்டும்.