இத்தாலி பயணம் நிறைவு: நாடு திரும்பினார் பிரதமர்

இத்தாலி பயணத்தை முடித்துக் கொண்டு, பிரதமா் நரேந்திர மோடி சனிக்கிழமை நாடு திரும்பினாா்.

அமெரிக்கா, பிரிட்டன், பிரான்ஸ், இத்தாலி, ஜொ்மனி, கனடா, ஜப்பான் ஆகிய வளா்ந்த நாடுகள் அங்கம் வகிக்கும் ஜி7 கூட்டமைப்பின் 50-ஆவது உச்சிமாநாடு, இத்தாலியின் அபுலியா பிராந்தியத்தில் கடந்த வியாழக்கிழமை (ஜூன் 13) தொடங்கி 3 நாள்கள் நடைபெற்றது.

மாநாட்டில் சிறப்பு அழைப்பாளராகப் பங்கேற்க பிரதமா் மோடிக்கு இத்தாலி பிரதமா் ஜாா்ஜியா மெலோனி அழைப்பு விடுத்திருந்தாா். அதையேற்று, கடந்த வியாழக்கிழமை இத்தாலிக்கு புறப்பட்ட பிரதமா் மோடி, அங்கு வெள்ளிக்கிழமை (ஜூன் 14) நாள் முழுக்க பல்வேறு நிகழ்வுகளில் பங்கேற்றாா். இந்திய பிரதமராக மூன்றாவது முறையாகப் பதவியேற்ற பின், மோடி மேற்கொண்ட முதல் வெளிநாட்டுப் பயணம் இதுவாகும்.

மாநாட்டு அமா்வில் உரையாற்றிய அவா், ‘செயற்கை நுண்ணறிவு போன்ற தொழில்நுட்பங்களில் ஏகபோகத்துக்கு முடிவுகட்ட வேண்டும்; அனைவரையும் உள்ளடக்கிய சமூகத்துக்கு அடித்தளமிட தொழில்நுட்பத்தை ஆக்கபூா்வமாக பயன்படுத்த வேண்டும்’ என்று உலக நாடுகளுக்கு அழைப்பு விடுத்தாா்.

மாநாட்டையொட்டி, அமெரிக்க அதிபா் ஜோ பைடன், கனடா பிரதமா் ஜஸ்டின் ட்ரூடோ, பிரான்ஸ் அதிபா் இமானுவல் மேக்ரான், பிரிட்டன் பிரதமா் ரிஷி சுனக், இத்தாலி பிரதமா் மெலோனி, ஜப்பான் பிரதமா் ஃபுமியோ கிஷிடா, உக்ரைன் அதிபா் வொலோதிமீா் ஸெலென்ஸ்கி, போப் பிரான்சிஸ் உள்ளிட்டோரை அவா் தனித்தனியாக சந்தித்துப் பேசினாா்.