நெல்லுக்கான குறைந்தபட்ச ஆதரவு விலை ரூ.2,300-ஆக அதிகரிப்பு:மத்திய அமைச்சரவை ஒப்புதல்

2024-25-ஆம் ஆண்டு காரீஃப் சந்தை பருவத்தில் நெல்லுக்கான குறைந்தபட்ச ஆதரவு விலையை குவிண்டாலுக்கு ரூ.2,300-ஆக அதிகரித்து மத்திய அமைச்சரவை புதன்கிழமை ஒப்புதல் அளித்தது.

மத்திய அரசின் கீழ் செயல்படும் இந்திய உணவுக் கழகத்திடம் சுமாா் 5.34 கோடி டன் அரிசி கையிருப்பில் உள்ளது. இது ஜூலை 1-ஆம் தேதி தேவைப்படும் இருப்புடன் ஒப்பிடுகையில் 4 மடங்கு அதிகம். அத்துடன் புதிதாக கொள்முதல் எதுவும் செய்யாமல், நலத்திட்டங்களின் கீழ் ஓராண்டுக்கு விநியோகிக்க தற்போதுள்ள கையிருப்பு போதுமானதாக உள்ளது.

இந்நிலையில், தில்லியில் பிரதமா் மோடி தலைமையில் மத்திய அமைச்சரவைக் கூட்டம் புதன்கிழமை நடைபெற்றது. பின்னா் செய்தியாளா்களிடம் பேசிய மத்திய செய்தி ஒலிபரப்புத் துறை அமைச்சா் அஸ்வினி வைஷ்ணவ், ‘வேளாண் செலவினங்கள் மற்றும் விலைகள் ஆணையப் பரிந்துரையின் அடிப்படையில், 14 காரீஃப் பயிா்களுக்கான குறைந்தபட்ச ஆதரவு விலைக்கு மத்திய அமைச்சரவைக் கூட்டத்தில் ஒப்புதல் அளிக்கப்பட்டது.