ஆந்திரம், பிகாருக்கு அதிக நிதி ஒதுக்கீடு: 'காலம் ஒருநாள் மாறும்' - காங்கிரஸ் கருத்து

"மத்திய பட்ஜெட்டில் சிறப்பு நிதி ஒதுக்கீடு பெற்றதற்காக தேசிய ஜனநாயகக் கூட்டணி கட்சித் தலைவர்கள் சந்திரபாபு நாயுடுவும், நிதீஷ் குமாரும் இன்று குதூகலிக்கலாம்; ஆனால் இந்நிலை மாறும் காலம் வெகுதொலைவில் இல்லை' என்று காங்கிரஸ் மூத்த தலைவரும் எம்.பி.யுமான குமாரி ஷெல்ஜா தெரிவித்தார்.

மத்திய நிதிநிலை அறிக்கை மீதான விவாதத்தை மக்களவையில் புதன்கிழமை தொடங்கி வைத்து அவர் பேசியதாவது:

இந்த நிதிநிலை அறிக்கை யாருக்கானது? இரு மாநிலங்களுக்கும் மட்டுமானதா அல்லது ஒட்டுமொத்த தேசமும் கவனத்தில் கொள்ளப்பட்டதா? பிகார், ஆந்திர பிரதேச மாநிலங்களைத் தவிர்த்து அல்லது பாஜக கூட்டணி கட்சிகள் ஆட்சி செய்யும் மாநிலங்களைத் தவிர்த்து வேறு எந்த மாநிலமும் கவனத்தில் கொள்ளப்பட்டதாகத் தெரியவில்லை.