நீட்: முதலிடம் 61-இல் இருந்து 17 பேராக குறைந்தது : திருத்தப்பட்ட இறுதி முடிவுகள் வெளியீடு

நிகழாண்டு நடைபெற்ற நீட்-யுஜி தேர்வுக்கான திருத்தப்பட்ட இறுதி முடிவுகளை தேசிய தேர்வுகள் முகமை (என்டிஏ) வெள்ளிக்கிழமை வெளியிட்டது.

அதில், 720-க்கு 720 பெற்று முதலிடம் பெற்றவர்களின் எண்ணிக்கை 61-இல் இருந்து 17-ஆக குறைந்துள்ளது தெரியவந்துள்ளது.கருணை மதிப்பெண் ரத்து மற்றும் உச்சநீதிமன்ற உத்தரவின் அடிப்படையில் சர்ச்சைக்குரிய இயற்பியல் கேள்விக்கு வழங்கப்பட்ட மதிப்பெண்ணில் மாற்றம் செய்யப்பட்ட பின்னர், இந்தத் திருத்தப்பட்ட இறுதி முடிவுகளை என்டிஏ வெள்ளிக்கிழமை வெளியிட்டது.

தற்போது முதலிடம் பிடித்துள்ள 17 பேரில் தமிழகத்தைச் சேர்ந்த பி.ரஜனீஷ் (பட்டியலின பிரிவு) என்ற மாணவரும் இடம்பெற்றுள்ளார்.மேலும், தமிழகத்தைச் சேர்ந்த 10 பேர் முதல் 100 இடங்களில் இடம்பெற்றுள்ளனர்.

இளநிலை மருத்துவப்படிப்புகள் சேர்க்கைக்கான தேசிய தகுதிகாண் நுழைவுத்தேர்வு (நீட்) கடந்த மே 5-ஆம் தேதி நடத்தப்பட்டது.நாடு முழுவதும் 23.33 லட்சம் மாணவ,மாணவிகள் பங்கேற்ற இந்தத் தேர்வு,வினாத்தாள்கசிவு, கருணை மதிப்பெண் வழங்கியது,ஹரியாணாவில் ஒரே மையத்தில் தேர்வெழுதிய 6 பேர் உள்பட 67 பேர் முதலிடம் பிடித்தது என பல்வேறு சர்ச்சைகளில் சிக்கியது.

பிகார், ஜார்க்கண்ட் தேர்வுமையங்களில் வினாத்தாள்கசிவு,உத்தரபிரதேச தேர்வுமையத்தில் தேர்வுதொடங்குவதற்கு சிலமணிநேரங்களுக்கு முன்பாக சமூக வலைதளத்தில் வினாத்தாள் பதிவேற்றம், கருணை மதிப்பெண் என்ற பெயரில் குறிப்பிட்ட சில தேர்வர்களுக்கு தேர்வை நடத்திய தேசிய தேர்வுகள் முகமை (என்டிஏ) கூடுதல் மதிப்பெண் வழங்கியது என பல்வேறு சர்ச்சைகள் எழுந்தன.இந்த முறைகேடு புகார்கள்தொடர்பாக சிபிஐ விசாரணை மேற்கொண்டு வருகிறது.