இலங்கைக் கடற்படை படகு மோதி ராமேசுவரம் மீனவர் உயிரிழப்பு

ஒருவர் மாயம்; இருவர் மீட்பு

இலங்கைக் கடற்படையின் ரோந்துப்படகு, ராமேசுவரம் மீனவர்களின் படகு மீது மோதியதில் மீனவர் ஒருவர் கடலில் மூழ்கி வியாழக்கிழமை உயிரிழந்தார்.

கடலில் விழுந்த மேலும் மூவரில் ஒருவர் மாயமானார், 2 பேர் மீட்கப் பட்டு இலங்கைக்கு கொண்டு செல்லப்பட்டனர்.

ராமநாதபுரம் மாவட்டம், ராமேசுவரத்திலிருந்து புதன்கிழமை 400 விசைப்படகுகளில் 2,000 மீனவர்கள் கடலுக்குள் மீன் பிடிக்கச் சென்றனர்.

இவர்களில் சிலர், புதன்கிழமை இரவு நெடுந்தீவு அருகே மீன் பிடித்தபோது, அங்கு ரோந்துப் படகில் வந்த இலங்கைக் கடற்படையினர் தமிழக மீனவர்களை அங்கிருந்து வெளியேறக் கூறிவிரட்டினர்.