ஜம்மு-காஷ்மீர்: செப்.18 முதல் மூன்று கட்டத் தேர்தல்

அக்.1-இல் ஹரியாணா பேரவைத் தேர்தல்

ஜம்மு-காஷ்மீர் யூனியன் பிரதேச பேரவைக்கு செப். 18-ஆம் தேதி தொடங்கி மூன்று கட்டங்களாக தேர்தல் நடைபெற உள்ளது. 10 ஆண்டுகளுக்குப் பிறகு அங்கு பேரவைத் தேர்தல் நடைபெறுகிறது.

மேலும், ஹரியாணா மாநிலத்துக்கு அக். 1-ஆம் தேதி ஒரே கட்டமாக பேரவைத் தேர்தல் நடத்தப்படஉள்ளது.

இதற்கான அறிவிப்பை தலைமைத் தேர்தல் ஆணையர் ராஜீவ்குமார் தில்லியில் வெள்ளிக்கிழமை வெளியிட்டார்.

ஜம்மு-காஷ்மீர் மாநிலத்துக்கு அளிக்கப்பட்டு வந்த சிறப்பு அந்தஸ்துக்கான 370-ஆவது சட்டப் பிரிவு ரத்து செய்யப்பட்டு, ஜம்முகாஷ்மீர், லடாக் என இரு யூனியன் பிரதேசங்களாக பிரிக்கப்பட்டபின்னர் நடத்தப்படும் முதல் பேரவைத் தேர்தல் இதுவாகும்.

அரசமைப்புச் சட்டத்தின் 370ஆவது பிரிவை கடந்த 2019-ஆம் ஆண்டு ஆகஸ்ட் 5-ஆம் தேதி மத்திய அரசு ரத்து செய்தது. மத்திய அரசின் இந்த நடவடிக்கைக்கு எதிராக உச்சநீதிமன்றத்தில் பல மனுக்கள் தாக்கல் செய்யப்பட்டன.

இந்த வழக்கை விசாரித்து கடந்த டிசம்பர் மாதம் தீர்ப்பளித்த உச்சநீதிமன்றத் தலைமை நீதிபதி டி.ஒய். சந்திரசூட் தலைமையிலான 5 நீதிபதிகள் அமர்வு, 'சட்டப் பிரிவு 370ஐ நீக்கியது செல்லும்' என்று உத்தரவிட்டது. அதோடு, ஜம்மு-காஷ்மீருக்கு விரைவில் மாநில அந்தஸ்து வழங்க நடவடிக்கை மேற்கொண்டு, செப்.30-ஆம் தேதிக்குள் பேரவைத் தேர்தலை நடத்த வேண்டும் என்று தேர்தல் ஆணையத்துக்கு உத்தர விட்டது.