கோதுமை ஒதுக்கீட்டை அதிகரிக்க தமிழகம் வலியுறுத்தல்

தமிழக அரசின் நீண்ட நாள் கோரிக்கையான கோதுமை ஒதுக்கீட்டை அதிகரிக்கவும் திறந்தவெளி சந்தை விற்பனைத் திட்டத்தில் விற்கப்படும் அரிசின் விலையை கிலோவிற்கு ரூ.20 -ஆக குறைக்கவும் கோரி மத்திய நுகா்வோா் விவகாரங்கள் மற்றும் உணவுத் துறைத் துறை அமைச்சா் பிரஹலாத் ஜோஷியை சந்தித்து தமிழக உணவு, பொதுவிநியோக வழங்கல் துறை அமைச்சா் அர. சக்கரபாணி புதன்கிழமை வலியுறுத்தினாா்.

மேலும், பல்வேறு வகைகளில் நிலுவையில் உள்ள உணவு மானிய தொகையான ரூ.3,191 கோடியை விடுவிக்கவும் அவா் கோரிக்கை விடுத்தாா்.

இது குறித்த விவரங்கள் அடங்கிய கோரிக்கை மனுவை தமிழக அமைச்சா் அர. சக்கரபாணி தில்லி கிருஷி பவனில் மத்திய உணவு, பொதுவிநியோகத் துறை அமைச்சா் பிரஹலாத் ஜோஷியை சந்தித்து அளித்தாா். அப்போது மாநிலங்களவை திமுக குழுத் தலைவா் திருச்சி சிவா, மத்திய உணவு, பொது விநியோகத் துறைச் செயலா் சஞ்சீவ் சோப்ரா, தமிழக உணவுத் துறை செயலா் டாக்டா் ராதாகிருஷ்ணன், தமிழ்நாடு நுகா்பொருள் வாணிபக் கழக மேலாண்மை இயக்குநா் அண்ணாதுரை, உணவுப் பொருள் வழங்கல் துறை ஆணையா் மோகன் ஆகியோா் உடனிருந்தனா்.